Аддзел навін 7 снежня 2022, 13:25

Маск «наехаў» на ўлады Сан-Францыска — яны зацікавіліся спальнямі ў офісе Twitter

Маск раскрытыкаваў улады Сан-Францыска за расследаванне, якое было распачатае пасля навін пра з’яўленне спальных памяшканняў у штаб-кватэры Twitter. Мільярдэр лічыць, што кампанію цкуюць за тое, што яна клапоціцца пра супрацоўнікаў.

1 каментарый

Маск раскрытыкаваў улады Сан-Францыска за расследаванне, якое было распачатае пасля навін пра з’яўленне спальных памяшканняў у штаб-кватэры Twitter. Мільярдэр лічыць, што кампанію цкуюць за тое, што яна клапоціцца пра супрацоўнікаў.

Апошнімі тыднямі некалькі канферэнц-залаў Twitter былі пераабсталяваныя ў пакоі адпачынку з неабходнай мэбляй, напрыклад, столікамі ля ложкаў і фатэлямі. У кампаніі знікла патрэба ў ранейшай колькасці канферэнц-залаў пасля масавых звальненняў і адставак, якія адбыліся ад моманту ўгоды з Маскам пры канцы кастрычніка.

У дэпартаменце, які займаецца інспекцыяй будынкаў, мясцоваму выданню San Francisco Chronicle сказалі, што напярэдадні атрымалі скаргу на спальні ў офісе Twitter і што правядуць там праверку на парушэнне будаўнічых нормаў.

«То-бок улады Сан-Францыска цкуюць кампаніі за тое, што яны паставілі ложкі для стомленых супрацоўнікаў, замест таго, каб упільноўваць дзяцей ад фентанілу. Такія ў вас прыярытэты», — адзначыў бізнэсовец.

So city of SF attacks companies providing beds for tired employees instead of making sure kids are safe from fentanyl. Where are your priorities @LondonBreed?!https://t.co/M7QJWP7u0N
— Elon Musk (@elonmusk) December 6, 2022

Да твіту ён прымацаваў нядаўні артыкул таго ж выдання пра дзіця, якое знайшло апіоід на гульнявой пляцоўцы і ледзь не памерла. Той выпадак пракаментавала мэр горада Лондан Брыд — сказала, што трэба папрацаваць над бяспекай грамадскіх месцаў і прыцягнуць прадаўцоў наркотыку да адказнасці.

Яшчэ да закрыцця ўгоды з Twitter у Маска была ідэя ператварыць офіс Twitter у прытулак для бяздомных, бо супрацоўнікі перайшлі на аддаленую працу і больш не з’яўляюцца ў офісе. Але потым прадпрымальнік аддаленую працу скасаваў.

Перажываць трансфармацыю Twitter на добраахвотных пачатках дапамагаюць супрацоўнікі Tesla і Boring Company, якія ўзначальвае Маск, — яны ўзялі на сябе некаторыя задачы ў сацсетцы. Адзначаецца, што спальныя пакоі маглі быць зробленыя для іх.