Meta скардзіцца, што новая камісія на рэкламу ў App Store — гэта прамы ўдар па яе бізнэсе

«Apple працягвае развіваць сваю палітыку, накіраваную на развіццё ўласнага бізнэсу, адначасова падрываючы іншых у лічбавай эканоміцы. Раней Apple заяўляла, што не бярэ долі даходаў ад рэкламы для распрацоўшчыкаў, а цяпер, відаць, змяніла сваё меркаванне. Мы па-ранейшаму імкнемся прапаноўваць малым прадпрыемствам простыя спосабы паказу рэкламы і развіцця іх бізнэсу ў нашых праграмах», — заявіў прадстаўнік Meta Том Чэннік.

Гаворка вядзецца пра аплату за прасоўванне пастоў — распаўсюджанай функцыі не толькі ў праграмах Meta, але таксама і ў іншых сэрвісах, такіх як Twitter і TikTok. Apple абнавіла правілы App Store і цяпер патрабуе, каб распрацоўшчыкі дзяліліся даходамі ад такіх унутраных пакупак — у памеры стандартных 30%. The Verge адзначае, што гэта першы выпадак, калі Apple наўпрост абкладае камісіяй рэкламу ў праграмах для iOS.

Прадстаўнік Apple Пітэр Аджамян заявіў, што падстаў турбавацца няма. «Ужо шмат гадоў у кіруючых прынцыпах App Store выразна пазначана, што продаж лічбавых тавараў і паслуг адбываецца праз куплю ў праграме. Прасоўванне, за якое плаціць асобны чалавек або арганізацыя для павелічэння ахопу пасту або профілю, з’яўляецца лічбавай паслугай, для якой патрабуецца купля ў праграме», — растлумачыў ён.