Meta паказала першыя сапраўдныя AR-акуляры

Прылада мае на ўвазе накладанне карыстальніку галаграм на навакольныя прадметы ў памяшканні і па-за ім, з якімі можна будзе ўзаемадзейнічаць.

Акуляры ў аправе з металічнага сплаву абсталяваныя кастамным працэсарам распрацоўкі Meta. Кіраваць імі можна будзе голасам, рухам вачэй і жэстамі рук, якія будуць адсочвацца з дапамогай «нейроннага» бранзалета, што ідзе ў камплекце. Таксама акуляры аснашчаныя разумнымі дысплэямі і нейрасеткай Meta AI — яна зможа, напрыклад, падказаць, што прыгатаваць з прадуктаў, якія ляжаць на стале, і згенеруе рэцэпт.

Для масавай вытворчасці гаджат пакуль не гатовы — Meta хоча зрабіць яго кампактнейшым і даступнейшым, перш чым выпускаць на рынак. Тым не менш акуляры будуць прымяняцца ўнутры кампаніі. Паводле слоў крыніц Reuters, першыя партыі AR-акуляраў могуць трапіць у рукі спажыўцоў у 2027 годзе. Распрацоўшчыкі тэрмінаў не ўдакладняюць.