Meta запусціла генератыўны рэдактар любога відэа

Інструмент дазваляе рэдагаваць ролікі на працягу першых 10 секундаў відэа. Сэрвіс прапануе больш за 50 перадусталяваных падказак, якія можна выкарыстоўваць для рэдагавання: ужываць тэму, змяняць фон выявы і адзенне герояў. З дапамогай Meta AI можна змяніць стыль кліпа на гульнявы або анімэ, зрабіць так, каб выява выглядала знятай у пустыні або ў гарах.

Рэдактар даступны ў дадатку Meta AI, на сайце сэрвіса і ў дадатку Edits для карыстальнікаў з ЗША і больш чым дзесяці краін па ўсім свеце. Таксама кіраўнік Instagram Адам Масеры заявіў, што ўжо запланавана інтэграцыя генератыўнай функцыі ў сацсетку.

Карыстальнікі скардзяцца, што пакуль тэхналогія далёкая ад дасканаласці: відэа перафарбоўвае тэкстуры ў сюррэалістычныя колеры, у персанажаў з’яўляюцца ненатуральныя адценні і г. д. Meta паабяцала ў будучыні дадаць магчымасць выкарыстання ўласных карыстальніцкіх падказак.