Алеся Чапкевич world 21 лістапада 2025, 14:17

Microsoft прызнала, што амаль усе асноўныя кампаненты Windows 11 зламаныя

Microsoft прама сказала, што большасць ключавых кампанентаў Windows 11 няспраўныя, піша Neowin.

Кампанія апублікавала артыкул на сайце сваёй службы падтрымкі, у якім афіцыйна прызнала, што некарэктна працуюць амаль усе асноўныя кампаненты Windows 11.

Непаладкі звязаны з XAML — фірменнай мовай разметкі Microsoft на базе XML для стварэння карыстальніцкіх інтэрфейсаў у аплікацыях .NET. Кампанія кажа, што праблемы ёсць ва ўсіх кампанентаў абалонкі Windows 11, уключаючы меню «Пуск», панэль задач, «Праваднік» і «Параметры».

Выданне таксама звярнула ўвагу на таймінг рэлізу — з моманту выхаду сістэмы на рынак прайшло больш за 4 гады. У ім ідзе гаворка аб самым свежым зборы 25H2, але ў ім выкарыстоўваецца тая ж кодавая база, што ў леташнім 24H2, які таксама наўрад ці ідэальны.

Нядаўна кампанію раскрытыкавала Nvidia — абвінаваціла яе ў тым, што нядаўнія патчы для Windows 11 зніжаюць прадукцыйнасць у гульнях. Чыпмэйкеру давялося самому тэрмінова выпускаць новую версію драйвера для сваіх відэакарт, каб аднавіць яе.