Microsoft прэзентавала першыя цалкам распрацаваныя ўнутры кампаніі мадэлі штучнага інтэлекту. Запуск MAI–Voice-1 і MAI-1-preview — спроба знізіць залежнасць карпарацыі ад OpenAI, на чыіх мадэлях дагэтуль у асноўным працаваў сэрвіс Copilot.
Microsoft прэзентавала першыя цалкам распрацаваныя ўнутры кампаніі мадэлі штучнага інтэлекту. Запуск MAI–Voice-1 і MAI-1-preview — спроба знізіць залежнасць карпарацыі ад OpenAI, на чыіх мадэлях дагэтуль у асноўным працаваў сэрвіс Copilot.
Першая мадэль, MAI–Voice-1, адказвае за генерацыю натуральнай мовы. Паводле дадзеных распрацоўшчыкаў, яна здольная ствараць хвіліну аўдыё менш чым за секунду, выкарыстоўваючы толькі адзін графічны працэсар. Зараз MAI–Voice-1 ужо прымяняецца ў функцыях Copilot Daily і падкастах, дзе ШІ-вядучы зачытвае навіны і абмяркоўвае актуальныя тэмы. Карыстальнікі могуць пратэставаць мадэль у Copilot Labs, выбіраючы голас і стыль мовы.
Другая распрацоўка — MAI-1-preview — гэта тэкставая мадэль і першая мадэль Microsoft, навучаная цалкам на ўласнай базе. Для яе трэніроўкі кампанія задзейнічала каля 15 000 GPU Nvidia H100. Для параўнання, канкурэнтныя мадэлі, такія як Grok ад xAI, патрабуюць больш за 100 000 такіх чыпаў. MAI-1-preview ужо даступная для тэставання на платформе LMArena і ў бліжэйшыя тыдні з’явіцца ў асобных сцэнарыях выкарыстання Copilot.
Кіраўнік падраздзялення Microsoft AI Мустафа Сулейман адзначыў, што ў распрацоўцы акцэнт быў зроблены на эфектыўнасць і зніжэнне кошту вылічэнняў. «Мастацтва навучання мадэляў усё больш зводзіцца да правільнага выбару дадзеных і таго, каб не марнаваць магутнасці на бескарысныя токены, якія нічому не вучаць мадэль», — распавёў ён.
Хоць Microsoft па-ранейшаму выкарыстоўвае GPT-тэхналогіі OpenAI у Copilot, запуск уласных мадэляў паказвае імкненне кампаніі да незалежнасці ў сферы ШІ. «У нас ёсць велізарная пяцігадовая дарожная карта, у якую мы працягваем інвеставаць квартал за кварталам», — падкрэсліў Сулейман.
Рэлацыраваліся? Цяпер вы можаце каментаваць без верыфікацыі акаўнта.