«Мінсктранс» скасаваў рэйсы ў Літву і Латвію на некалькі дзён

Адменены рэйсы ў Вільню і Коўна, а таксама ў Рыгу — і ў адваротныя бакі — на сёння, заўтра і паслязаўтра.

27 кастрычніка не адбудуцца 2 запланаваных рэйса з Мінска і 5 рэйсаў у Мінск, 28 кастрычніка — 6 рэйсаў з Мінска і 5 у Мінск, 29 кастрычніка — адзін рэйс з Мінска ў Вільню.

Пасажырам абяцаюць поўнасцю вярнуць грошы за білеты. Якіх менавіта рэйсаў датычылася гэтая нечаканасць, можна паглядзець у пасце «Мінсктранса».

Нагадаем, учора Літва вырашыла бестэрмінова закрыць мяжу з Беларуссю з-за кантрабандных метэазондаў, у сувязі з якімі некалькі разоў на мінулым тыдні прыпыняў працу аэрапорт Вільні. Па інфармацыі Delfi, улады краіны разглядаюць абмежаванне транзіту ў расійскі Калінінград і бестэрміновае закрыццё мяжы з Беларуссю. Пытанне будзе абмяркоўвацца на пасяджэнні ўрада ў сераду.

У Службе аховы дзяржмяжы Літвы растлумачылі, што пункт пропуску «Шальчынінкай» («Беняконі») цалкам закрыты на нявызначаны тэрмін. Праз «Мядзінінкай» («Каменны лог») рух абмежаваны — перасячы мяжу могуць толькі асобы з дыпламатычнымі пашпартамі Літвы або тыя, хто перавозіць дыппошту; асобы, якія едуць у Калінінградскую вобласць транзітам з Беларусі або назад; грамадзяне Літвы/краін ЕС і члены іх сем’яў, а таксама ўладальнікі дзейнага ВНЖ Літвы, якія накіроўваюцца ў Літву.