На софт з «недружалюбных краін» не трэба згоды праваўладальнікаў — закон

Новы закон дазваляе выкарыстоўваць аб’екты інтэлектуальнай уласнасці без згоды праваўладальніка або арганізацыі па калектыўным кіраванні маёмаснымі правамі з замежных дзяржаў, якія ажыццяўляюць недружалюбныя дзеянні. Ён прыняты «з мэтай забеспячэння функцыянавання інфармацыйна-камунікацыйнай інфраструктуры, стварэння ўмоў для лічбавага развіцця і павышэння ўзроўню інфармацыйнай бяспекі», а таксама «развіцця інтэлектуальнага і духоўна-маральнага патэнцыялу грамадства».

Што можна браць без дазволу

— камп’ютарную праграму, праваўладальнікам якой з’яўляецца асоба, уключаная ў пералік праваўладальнікаў камп’ютарных праграм;

— аўдыявізуальны твор <…> які ўваходзіць у склад тэлепраграмы, рэдакцыяй якой з’яўляецца дзяржаўная арганізацыя, <…> і (або) які выкарыстоўваецца кінапракатнымі і (або) кінавідовішчнымі арганізацыямі;

— музычны твор, праваўладальнік якога ўключаны ў адпаведны пералік праваўладальнікаў музтвораў;

— перадачу арганізацыі вяшчання, праваўладальнікам якой з’яўляецца асоба, уключаная ў пералік праваўладальнікаў перадач.

Хто вызначае спісы «недружалюбных»

Упаўнаважаныя дзяржорганы. Іх, у сваю чаргу, вызначае Саўмін.

Дарэчы, яшчэ ў красавіку 2022 года Саўмін зацвердзіў пералік дзяржаў, якія здзяйсняюць «недружалюбныя дзеянні». У ім — краіны ЕС, Вялікабрытанія і іншыя еўрапейскія дзяржавы, ЗША, Канада, Аўстралійскі Саюз.

А ці будуць плаціць за карыстанне?

Так. Акрамя выпадкаў, калі праваўладальнік нічога не просіць. 

Узнагароджанне абяцаюць залічаць на банкаўскія рахункі патэнтнага органа да запатрабавання праваўладальнікам. Незапатрабаванае на працягу трох гадоў — вяртаць у рэспубліканскі бюджэт.

Памер узнагароджання будзе вызначаць Саўмін.

Што яшчэ можна рабіць без папытання

Увозіць тавары з пераліку «істотна важных для ўнутранага рынку», якія змяшчаюць аб’екты інтэлектуальнай уласнасці, без згоды замежных праваўладальнікаў, у тым ліку з краін, якія ажыццяўляюць «недружалюбныя дзеянні».

Выкарыстанне аб’ектаў інтэлектуальнай уласнасці, уключаных у такія тавары, не прызнаецца парушэннем выключных правоў на гэтыя аб’екты.

Спісы важных тавараў таксама вызначаць упаўнаважаныя дзяржорганы на прызначэнне Саўміна.

Калі тавар уключылі ў пералік «важных», то аб’ект інтэлектуальнай уласнасці ў яго складзе часова выключаць з нацыянальнага мытнага рэестра аб’ектаў інтэлектуальнай уласнасці.

Асноўныя артыкулы закона ўступаюць у сілу праз 10 дзён пасля яго афіцыйнага апублікавання.