Чаму звольненым супрацоўнікам PandaDoc так ахвотна дапамагаюць і якія пазіцыі ім могуць прапанаваць? Спыталі пра гэта ў былой HR у PandaDoc і ў фаўндара стартапа, які прапанаваў экс-«пандам» працу.
Чаму звольненым супрацоўнікам PandaDoc так ахвотна дапамагаюць і якія пазіцыі ім могуць прапанаваць? Спыталі пра гэта ў былой HR у PandaDoc і ў фаўндара стартапа, які прапанаваў экс-«пандам» працу.
Навіна пра звальненні ад тэхнічнага дырэктара і сузаснавальніка PandaDoc Сяргея Барысюка LinkedIn сустрэў хваляй спачувальных пастоў і прапановаў памагчы. Як расказала адна са звольненых супрацоўніц украінскага офіса кампаніі, былыя супрацоўнікі PandaDoc ды іншыя прадстаўнікі tech community актыўна падтрымліваюць тых, хто трапіў пад нядаўняе скарачэнне, дадаюцца ў кантакты і час ад часу прапануюць вакансіі.
Сярод шматлікіх пастоў з выражэннем маральнага падтрымання і рэкамендацый сапраўды ёсць нямала прапановаў практычнай дапамогі. Як гэта часта бывае пасля рэзанансных звальненняў, беларускія (і не толькі) айцішнікі прапануюць тым, хто трапіў у бяду, вакансіі. Робяць гэта як звычайныя супрацоўнікі, так і ўладальнікі бізнесаў:
Ёсць і сустрэчныя прапановы, калі карыстальнікі LinkedIn рэкамендуюць тых, хто трапіў пад скарачэнне ў PandaDoc, сваёй сетцы кантактаў:
Яшчэ адзін кірунак, з якога экс-супрацоўнікам PandaDoc прапануюць дапамогу — бясплатная псіхалагічная падтрымка, кансультаванне, прапановы падзяліцца карыснымі кантактамі і коучынг. Падтрымка ідзе як ад былых калег, якія пакінулі PandaDoc у мінулыя гады, так і ад людзей, папросту знаёмых з дзейнасцю кампаніі і яе супрацоўнікамі:
Такі шчыльны струмень падтрымання выглядае крыху незвычайна на фоне апошніх звальненняў унутры Беларусі і за яе межамі. Вядома, сваю долю спачування ад ІТ-супольнасці пры офбордынгу атрымліваюць супрацоўнікі многіх кампаній. Але буйныя звальненні даўно сталі звычайнай справай, і такія прыкметныя праявы галіновай салідарнасці ў апошнія гады здараліся нячаста.
Пра магчымыя прычыны такой рэакцыі на звальненні менавіта ў гэтай кампаніі мы спыталі ў адной з яе былых супрацоўніц. Ліза* пакінула PandaDoc яшчэ да 2026 года і працягвае будаваць кар’еру ў іншай кампаніі. Але пасля навінаў пра нядаўнія скарачэнні хутка прапанавала экс-калегам падтрымку, рэкамендацыі і бясплатную дапамогу з кар’ерным коучынгам:
— Чаму айцішнікаў з PandaDoc так актыўна падтрымліваюць і прапануюць ім працу?
— Я ўжо нейкі час не працую ў PandaDoc, таму тое, што я кажу — гэта мая асабістая пазіцыя як былой калегі і HR-прафесіяналкі.
Мне здаецца, такое падтрыманне шмат у чым звязаная з культурай кампаніі і рэпутацыяй людзей, якія ў ёй працуюць. У маім досведзе PandaDoc — гэта моцныя спецыялісты і дастаткова сталы менеджмент, які ўмее ўлічваць і бізнес-арыенціры, і чалавечы фактар.
У той перыяд, калі я працавала ў кампаніі, вялікая ўвага надавалася таму, наколькі чалавек пасуе камандзе. Кампетэнцыі і культурны код (які, дарэчы, быў апублікаваны ў свабодным доступе) былі ўбудаваныя ў сістэму на дзеяннях: інтэрв’ю паводле кампетэнцый, развіцця, ацэнкі. «Выпадковых пандаў» я сустракала вельмі мала. За гэтым стаяла сур’ёзная праца, якая, на мой погляд, і дапамагла сфарміраваць унутраную супольнасць. Такія сувязі захоўваюцца і пасля выхаду з кампаніі.
Ахвота, з якой былым супрацоўнікам PandaDoc у LinkedIn прапануюць вакансіі, верагодна, звязана з іх экспертызай. Сама экспертыза, вядома, залежыць ад канкрэтнай ролі. Але акрамя прафесійных ведаў я б адзначыла такія рысы супрацоўнікаў кампаніі, як самастойнасць, адказнасць за вынік і ўменне дамаўляцца.
У маім досведзе праца ў PandaDoc была арганізаваная перш за ўсё ў remote-фармаце, нягледзячы на наяўнасць каворкінгаў. Такі фармат патрабуе ўмення арганізаваць сябе, кіраваць часам, абазначаць складанасці і рухаць задачы наперад без пастаяннага вонкавага кантролю. У спалучэнні з досведам працы над міжнародным прадуктам гэта каштоўныя якасці для працадаўцы.
Тым, хто страціў працу, я б перш за ўсё сказала: скарачэнне само па сабе не вызначае вашу прафесійную каштоўнасць. Вашыя навыкі, досвед і вынікі не зніклі разам з пасадай.
Не абавязкова адразу бачыць у тым, што здарылася, «новую магчымасць». Можна злавацца, засмучацца, адчуваць разгубленасць. Калі абставіны дазваляюць, карысна даць сабе час, перш чым уключацца ў актыўны пошук.
Затым варта вярнуцца да канкрэтных фактаў пра сябе: якія задачы вы вырашалі, чаго дасягнулі, які ўнёсак зрабілі, за якой дапамогай да вас звярталіся калегі. Не бойцеся папрасіць зваротную сувязь і рэкамендацыі ў людзей, з якімі працавалі. У складаны момант бывае цяжка самастойна ўбачыць свае моцныя бакі, і такі погляд збоку дапамагае аднавіць упэўненасць.
І не саромейцеся звяртацца за канкрэтнай дапамогай: паглядзець рэзюмэ, пазнаёміць з наймальным менеджарам, падрыхтавацца да інтэрв’ю або абмеркаваць наступны кар’ерны крок. Людзям часта хочацца падтрымаць іншых, але яны не заўсёды разумеюць, што менавіта цяпер будзе карысным для вас.
Сярод людзей, якія прапанавалі тым, хто трапіў пад скарачэнне ў PandaDoc, працу, мы заўважылі заснавальніка ШІ-стартапа ENDGAME з Нідэрландаў Сашу Астапенку. У сваім посце ён расказаў, што ў 2016 годзе паспяхова прайшоў суразмову ў PandaDoc і, хоць тады абраў іншы шлях, захапляецца і паважае гэтую кампанію і людзей, якія ў ёй працуюць. Цяпер жа ў ягонай кампаніі ёсць больш за 50 адкрытых вакансій. Тры былыя супрацоўнікі PandaDoc на момант публікацыі паста ўжо знайшлі ў ENDGAME працу, а зацікаўленых у працы з ліку нядаўна звольненых Саша Астапенка папрасіў напісаць яму.
Чаму ENDGAME цікавяць былыя супрацоўнікі PandaDoc і якую працу стартап можа ім прапанаваць? Спыталі пра гэта ў заснавальніка.
— Тры былыя супрацоўнікі PandaDoc, пра якіх вы напісалі ў сваім посце — гэта свежыя наймы ці людзі, якія перайшлі ў ENDGAME раней?
— Усе трое прыйшлі да нас раней, яшчэ да гэтай хвалі скарачэнняў. Іх досвед і водгукі — адна з прычынаў, чаму мы адкрыта запрасілі хлопцаў і дзяўчат з PandaDoc.
— Якога профілю ў вас вакансіі? Ці ёсць супадзенні са стэкам PandaDoc?
Цяпер у нас больш за 50 адкрытых пазіцый. У асноўным гэта інжынерныя і архітэктурныя ролі.
• Solution Architects і Technology Consultants;
• Product Engineers, гэта значыць full-stack інжынеры, якія працуюць наўпрост з кліентам;
• Delivery Managers і AI-кансультанты, якія вядуць праекты і ўкараняюць AI-падыходы ў кліентаў.
Са стэкам PandaDoc перасячэнне вялікае: Python, TypeScript/React, Node.js, воблакі (AWS, Azure, GCP), Kubernetes, CI/CD. Але канкрэтны стэк для нас не галоўнае. Мы працуем паводле агентнай мадэлі: значную частку кода пішуць AI-агенты пад кантролем інжынера. Таму важнейшыя інжынернае мысленне, прадуктовы падыход і гатоўнасць працаваць па-новаму. Досвед у моцнай прадуктовай кампаніі накшталт PandaDoc для нас вялікі плюс.
— Спецыялістаў з якіх юрысдыкцый вы гатовы наймаць? Ці ёсць варыянты з рэлакацыяй або дыстанцыйна?
— Штаб-кватэра ENDGAME знаходзіцца ў Амстэрдаме. Асноўная частка нашых кліентаў — буйныя кампаніі ў Еўропе і Вялікабрытаніі. Мы наймаем па ўсёй Еўропе, у тым ліку спецыялістаў з Польшчы і Партугаліі. Большасць роляў можна выконваць дыстанцыйна або ў гібрыдным фармаце. Для ключавых пазіцый разглядаем рэлакацыю ў Нідэрланды і дапамагаем з ёй. Галоўная патрабаванне — гэта свабодная англійская, таму што нашыя інжынеры кожны дзень працуюць з кліентамі наўпрост.
— Ці ёсць жорсткія абмежаванні па seniority?
— Асноўны фокус у нас на Lead-спецыялістах. Моцных Senior-спецыялістаў мы таксама разглядаем, асабліва тых, хто ўжо актыўна выкарыстоўвае AI-інструменты ў працы. Junior-пазіцый цяпер няма, але мы не выключаем іх у будучыні.
— ENDGAME — кансалтынгавая кампанія новага тыпу, якая з першага дня будуецца паводле агентнай мадэлі. Кампанію заснавалі вопытныя тэхнолагі, якія самі пішуць код і гадамі будавалі інжынерныя практыкі ў буйных сервісных кампаніях. Фармальна нам каля года, і за гэты час каманда вырасла прыблізна да 75 чалавек.
Рост тлумачыцца зрухам на рынку. Яшчэ нядаўна CTO буйных кампаній казалі нам, што агентная распрацоўка — гэта справа паўтара года, не раней. Цяпер яны пераводзяць яе ў прадакшн, без пілотаў. Кліенты кажуць, што традыцыйныя падрадчыкі не справляюцца з ШІ, ды м трэба сапраўды AI-native партнёр.
Асноўны попыт ідзе па двух напрамках:
• Агентная трансфармацыя распрацоўкі. Мы дапамагаем enterprise-камандам перабудаваць працэсы пад працу з AI-агентамі.
• Мадэрнізацыя legacy-сістэм. Напрыклад, аднаму кліенту ў Вялікабрытаніі мы за 6 тыдняў зрабілі тое, на што ў папярэдняга падрадчыка сышло 12 месяцаў.
Таму мы запускаем новыя напрамкі, адкрываем офісы і актыўна наймаем людзей. Будзем рады, калі гэты расказ дапаможа хлопцам і дзяўчатам з PandaDoc знайсці новае месца.
* — імя суразмоўніцы змененае на ейную просьбу
Релоцировались? Теперь вы можете комментировать без верификации аккаунта.