Касмічнае агенцтва ЗША абвясціла, што адкрые кантракт на стварэнне месяцовага пасадачнага модуля місіі Artemis 3 для новых удзельнікаў пасля таго, як праект SpaceX сутыкнуўся з сур’ёзнымі затрымкамі.
Касмічнае агенцтва ЗША абвясціла, што адкрые кантракт на стварэнне месяцовага пасадачнага модуля місіі Artemis 3 для новых удзельнікаў пасля таго, як праект SpaceX сутыкнуўся з сур’ёзнымі затрымкамі.
Выконваючы абавязкі кіраўніка NASA і міністр транспарту ЗША Шон Дафі заявіў у эфіры Fox News: «Я адкрываю гэты кантракт. Думаю, мы ўбачым удзел такіх кампаній, як Blue Origin, і, магчыма, іншых. Канкурэнцыя дапаможа паскорыць місію і вярнуць амерыканцаў на Месяц».
Рашэнне агенцтва азначае, што канкурэнты — у прыватнасці, Blue Origin Джэфа Безаса і Lockheed Martin — змогуць зноў пазмагацца за ўдзел у першай за паўстагоддзя пілатаванай пасадцы на Месяц.
Кантракт на распрацоўку месяцовага карабля Starship кампанія SpaceX атрымала яшчэ ў 2021 годзе, яго кошт ацэньваецца ў $4,4 мільярда. Згодна з планам, Starship павінен даставіць астранаўтаў на паверхню Месяца ў рамках місіі Artemis 3 не пазней за 2027 год.
Аднак, па даных NASA, праграма заўважна адстае ад графіка. «SpaceX робіць выдатныя рэчы, але яны адстаюць. Мы павінны дзейнічаць хутчэй, асабліва калі Кітай актыўна рыхтуе ўласную месяцовую місію да 2030 года», — адзначыў Дафі.
Пасля заявы чыноўніка Ілан Маск рэзка адрэагаваў у сацсетцы X, назваўшы міністра «Sean Dummy» і заявіўшы, што ў яго «IQ на дзве лічбы». У іншым пасце ён напісаў: «Шон Dummy спрабуе забіць NASA!».
Пазней Маск дадаў: «Чалавек, чыім галоўным дасягненнем з’яўляецца ўменне хутка лазіць па дрэвах, не павінен кіраваць касмічнай праграмай Амерыкі», — адсылаючы да мінулага Дафі як чэмпіёна па хуткасным лазанні.
Сам Дафі адказаў стрымана: «Люблю жарсць да справы. Гонка за Месяц пачалася. Вялікія кампаніі не павінны баяцца канкурэнцыі. Калі нашыя інаватары спаборнічаюць — выйграе Амерыка».
Тым часам NASA даручыла SpaceX і Blue Origin да 29 кастрычніка прадставіць паскораныя планы па высадцы на Месяц. Агенцтва таксама мае намер запытаць прапановы ў іншых удзельнікаў рынку, каб павялічыць тэмпы місій у рамках праграмы Artemis.
Місія Artemis 3 стане першай пілатаванай пасадкай на Месяц з 1972 года, калі завяршылася праграма Apollo. Яе поспех крытычна важны для лідарства ЗША ў новай «месяцовай гонцы», асабліва на фоне растучых касмічных амбіцый Кітая.
Рэлацыраваліся? Цяпер вы можаце каментаваць без верыфікацыі акаўнта.