Не будзь злом: паўтары тысячы супрацоўнікаў Google напісалі Пічаі ліст наконт звальненняў

Гуглеры заклікаюць кампанію прыпыніць найманне новых супрацоўнікаў і запаўняць вакансіі скарочанымі калегамі, а таксама дазволіць «дапрацаваць» да канца адпачынку тым, хто ўзяў яго для догляду дзіцяці або ў сувязі з цяжкай стратай.

Акрамя гэтага, яны запатрабавалі не звальняць сваіх калег з краін, ахопленых канфліктамі або гуманітарным крызісам, такіх як Украіна — у выпадку страты візы ім прыйдзецца вяртацца ў небяспечныя ўмовы.

Напрыканцы аўтары ліста нагадалі Google яе культавы лозунг: Don’t Be Evil. Кампанія адмовілася ад яго пяць гадоў таму.

Ліст падпісалі больш за 1400 чалавек.

У студзені кіраўнік Google і мацярынскага холдынгу Alphabet абвясціў аб неабходнасці скараціць прыкладна 12 тысяч супрацоўнікаў. Ён узяў на сябе «поўную адказнасць за рашэнні», якія прывялі да гэтага.

Неўзабаве супрацоўнікі сталі дзяліцца сваімі гісторыямі звальнення. Напрыклад, у адной сям'і працу страцілі муж і жонка, у іншым выпадку — супрацоўнік, які даглядаў смяротна хворую маці. Астатнія гуглеры расказваюць, як плакалі на мітынгах у дзень, калі былі анансаваныя скарачэнні.