Nvidia, Microsoft, Meta і іншыя тэхнагіганты папярэдзілі інвестараў, што ўкладвацца ў АІ рызыкоўна

Meta ўспомніла, што АІ можа выкарыстоўвацца для стварэння фэйкаў у часе выбараў, Microsoft разумее верагоднасць пазоваў аб парушэннях капірайту за выкарыстанне абароненых аўтарскім правам матэрыялаў для трэніроўкі нейрасетак, а Oracle проста прызнае, што яе АІ-прадукты могуць працаваць горш, чым у канкурэнтаў. Google мяркуе, што злоўжыванне ейнымі АІ-інструментамі «можа негатыўна паўплываць на правы чалавека, прыватнасць, занятасць і іншыя сацыяльныя праблемы», а гэта можа прывесці да пазоваў або фінансавага ўрэгулявання.

Усяго сёлета больш за дзясятак буйных ІТ-кампаній выпусцілі або абнавілі папярэджанні пра АІ у справаздачнай дакументацыі для рэгулятараў. Яны размешчаныя ў раздзеле пра рызыкі, дзе кампаніі прагназуюць, што можа пайсці не так. Да рызык залічваюць, напрыклад, непрадбачаныя абставіны накшталт кліматычных змен, войнаў або банкаўскіх крахаў.

Як адзначае Bloomberg, гэтыя папярэджанні гучаць вельмі цвяроза на фоне ўсеагульнага шаленства наконт АІ, хоць у некаторых выпадках супярэчаць афіцыйнай лініі кампаній. Adobe заўсёды сцвярджала, што праграмы накшталт Photoshop будуць незаменныя для мастакоў, а на пачатку года заявіла, што распаўсюджванне АІ можа знішчыць працоўныя месцы і патрэбу ў існым софце.

Часам прагнозы спраўджваюцца. Nvidia ад пачатку 2023 года папярэджвала, што асцярогі з нагоды злоўжывання АІ могуць прывесці да абмежаванняў на яе прадукты. Пазней ЗША ўвялі і паступова робяць больш жорсткімі абмежаванні на экспарт перадавых чыпаў.

Акрамя гэтага, пра звязаныя з АІ рызыкі сёлета казалі Palo Alto Networks, Dell і Uber.