3 гісторыі, як рэлаканты наймалі нянь у Грузіі, Літве і на Кіпры

Кейс 1: «Знайшлі няню праз групы ў Facebook»

• лакацыя: Грузія
• век дзіцяці: 3 гады
• хто дапамагае: няня 
• кошт: 1300 лары на месяц (каля 480 долараў па курсе)

Мы ў Грузіі з сакавіка. Нашаму дзіцяці 3 гады, і я як працавала ў дэкрэце ў Мінску, так і працягваю тут. Малому мы вельмі хутка знайшлі няню. Для пошуку выкарыстоўвалі групы ў Facebook — тут гэта асноўная сацсетка.

Наша няня працуе з 10:00 да 20:00, і ў месяц мы плацім ёй 1300 лары (каля 480 долараў па курсе) — гэта танней, чым у Мінску. Вывучалі і варыянты з садкамі, яны каштуюць каля 400 лары на месяц. Але мне зручней з няняй, бо ў дзіцячым садку дзеці часта хварэюць, а гэта дрэнна спалучаецца з працай.

Кейс 2: «Знайшлі жанчыну з Мінска — ідэальны мэтч»

• лакацыя: Кіпр
• век дзіцяці: 7 гадоў, двайняткі
• хто дапамагае: няня 
• кошт: 300-350 долараў на месяц

У мяне двое дзяцей — двайняткі-сямігодкі, з якімі мы пераехалі на Кіпр на пачатку мая. Паколькі школа пачнецца толькі ўвосень, то пытанне найму няні было для нас вельмі актуальным. Шукалі яе ўжо на месцы — у мясцовых чатах. У выніку знайшлі жанчыну з Мінска — таксама пераехала, яна фатограф, але яшчэ працуе з нашымі дзецьмі. Выбіралі паводле асабістых стасункаў, але таксама ўлічвалі рэакцыю нашых двайнятак. 

У выніку атрымаўся ідэальны мэтч — і няня, і дзеці атрымліваюць задавальненне ад таго, як бавяць час разам. Яны ездзяць на мора пазагараць і выкупацца, разам вывучаюць мовы і займаюцца, калі трэба — няня гатуе для дзяцей. Мы запрашаем няню ў будныя дні на 4-5 гадзін, у астатні час дзеці гуляюць на вуліцы з сябрамі (у нас вялікі закрыты жылы комплекс з добра развітай інфраструктурай, у тым ліку для дзяцей, уся тэрыторыя ахоўваецца). 

Паслугі няні абыходзяцца нам у 300-350 долараў. Пакуль шукалі, мы вывучалі, колькі гэта наогул можа каштаваць у паўночнай частцы Кіпра: дык вось няні з супер-пупер скіламі і ўсякімі дыпломамі просяць нерэальныя грошы — рахунак можа ісці на дзясяткі долараў на гадзіну.

Кейс 3: «Няня сказала, дзіцяці патрэбны псіхіятр. Развіталіся з ёй»

• лакацыя: Літва
• век дзіцяці: 2 гады
• хто дапамагае: прыватны дзіцячы садок 
• кошт: 560 еўра на месяц + 130 на харчаванне

Мы жывём у Літве, пераехалі ў лістападзе мінулага года. Для двухгадовай дачкі спачатку шукалі няню — заключылі кантракт з агенцыяй па падборы нянь, за пошук заплацілі 800+ еўра. Патрабаванне было такім: знайсці нашай малой рускамоўную няню з сучаснымі поглядамі на выхаванне.

Нам падабралі мясцовую 70-гадовую жанчыну, якая дрэнна гаварыла па-руску. Праз тыдзень спробаў прысябрыць з ёй двухгодку няня сказала, што дзіця «зашмат плача» — і ёй патрэбны псіхіятр. Развіталіся з няняй у тую ж секунду.

А праз пару тыдняў мы прывялі малую ў прыватны англамоўны садок — і цяпер усё выдатна: малая добра адаптавалася, навучылася лічыць да 10 і спяваць па-англійску. Выкладчыкі ў нашым садку гавораць на англійскай, але многія ведаюць і рускую, дый рускамоўных дзяцей багата. Усё супер, не лічачы дзіцячых вірусаў, але гэта непазбежна. 

Садок сярод іншых англамоўных прыватных дзіцячых садкоў мы выбіралі паводле апісання, але і па цане ён апынуўся ў сярэдзіне. Тут дзяржава на месяц кампенсуе 100 еўра на аплату садку пры наяўнасці дазволу на жыхарства, таму нам навучанне абыходзіцца ў 560 еўра + харчаванне (сняданак-абед-падвячорак) на месяц каля 130 еўра.

Яшчэ дадам, што цэны на паслугі няні, як мне сказалі ў агенцыі, у сярэднім у Літве складаюць 800-1000 еўра на месяц (пры працоўным графіку па 8 гадзін 5 дзён на тыдзень). Калі аплата пагадзінная, то гэта мінімум 5 еўра, а звычайна бліжэй да 10. 

Раскажыце пра свой досвед у каментарах!