Николай Чикишев world 29 кастрычніка 2025, 10:37

OpenAI цяпер не абавязана слухацца Microsoft: кампанія завяршыла рэструктурызацыю

OpenAI завяршыла найбуйнейшую ў гісторыі кампаніі рэструктурызацыю, якая замацавала за Microsoft статус аднаго з галоўных акцыянераў.

Пакінуць каментарый

OpenAI цяпер не абавязана слухацца Microsoft: кампанія завяршыла рэструктурызацыю

OpenAI завяршыла найбуйнейшую ў гісторыі кампаніі рэструктурызацыю, якая замацавала за Microsoft статус аднаго з галоўных акцыянераў.

Цяпер OpenAI афіцыйна функцыянуе як гібрыдная структура — некамерцыйны фонд OpenAI Foundation кантралюе публічную кампанію OpenAI Group PBC з ацэнкай каля $500 мільярдаў. OpenAI Foundation валодае 26% акцый, супрацоўнікі і інвестары — 47%, а Microsoft атрымала долю прыкладна ў 27%, кошт якой ацэньваецца ў $135 мільярдаў.

Такім чынам, OpenAI застаецца пад кантролем некамерцыйнай арганізацыі, але атрымлівае больш гнуткасці для прыцягнення капіталу, магчымага IPO і развіцця маштабных інфраструктурных праектаў.

Кіраўнік OpenAI Сэм Альтман заявіў, што кампанія «уступае ў новую фазу», ператвараючыся з распрацоўшчыка асобных прадуктаў у платформу, на аснове якой іншыя змогуць ствараць уласныя сэрвісы і бізнесы. «Цяпер мы можам выкарыстоўваць гэтую тэхналогію і нашу базу карыстальнікаў, каб увесь свет будаваў новыя кампаніі і аплікацыі», — адзначыў ён.

Microsoft захавала за сабой ключавыя партнёрскія правы да 2032 года, уключаючы долю ў даходах OpenAI і сумеснае выкарыстанне мадэляў, нават пасля магчымага дасягнення ўзроўню агульнага штучнага інтэлекту (AGI). Пры гэтым OpenAI цяпер не абавязана выкарыстоўваць Microsoft як эксклюзіўнага пастаўшчыка вылічальных магутнасцей.

Кампаніі дамовіліся, што OpenAI закупіць у Microsoft воблачныя сэрвісы Azure на суму $250 мільярдаў, а заява аб дасягненні AGI будзе правярацца незалежнай экспертнай камісіяй. OpenAI Foundation таксама вылучыць $25 мільярдаў на праекты ў галіне медыцыны і ўстойлівасці ШІ. Microsoft, якая інвеставала ў OpenAI з 2019 года больш за $13 мільярдаў, фактычна павялічыла кошт сваіх укладанняў амаль у дзесяць разоў.