Аддзел навін 2 лютага 2023, 12:19

OpenAI запусціла платную падпіску на ChatGPT

OpenАІ анансавала пілотную платную падпіску на нашумелы чатбот ChatGPT.

Тарыф ChatGPT Plus будзе каштаваць $20 на месяц. Падпісчыкам будзе забяспечаны доступ нават у перыяды высокай нагрузкі нейрасеткі, хутчэйшы час водгуку, а таксама прыярытэтны доступ да новых функцый і паляпшэнняў ChatGPT.

Першапачаткова падпіску змогуць купіць толькі карыстальнікі з ЗША. Запрашаць людзей з ліста чакання распрацоўшчыкі пачнуць найбліжэйшымі тыднямі. А «неўзабаве» плануюць пашырыць геаграфію доступу і падтрымкі на іншыя краіны.

Базавая версія ChatGPT па-ранейшаму будзе бясплатнай — у тым ліку дзякуючы запуску платнай падпіскі.

Падпіску будуць удасканальваць і пашыраць на аснове зваротнай сувязі і патрэб юзераў. Таксама найбліжэйшым часам будзе адкрыты ліст чакання на ChatGPT API — цяпер прапрацоўваюцца розныя тарыфныя планы для прыватных і карпаратыўных карыстальнікаў з розным напаўненнем.