Апублікаваны першы трэйлер GTA VI

Як ужо было вядома з уцечак, у GTA VI будуць два героі — Джэйсан і Люсія. Апошняя стане першым персанажам — жанчынай-пратаганістам. Паводле папярэдніх даных, героі могуць быць братам і сястрой з Лацінскай Амерыкі, якіх у дзяцінстве разлучыла смерць бацькоў, што загінулі ад рук сяброў наркакартэля. Джэйсан выступіць у ролі ўрадавага агента па барацьбе з наркотыкамі, тады як Люсія стане ўдзельніцай злачыннай групоўкі.

Дзеянне гульні разгорнецца ў Вайс-Сіці, вядомым з папярэдніх гульняў. Пры канцы відэароліка паведамляецца, што выхад гульні адбудзецца ў 2025 годзе. Папярэдняя версія гульні — Grand Theft Auto V — выйшла ў 2013 годзе.

Студыя планавала апублікаваць відэа пазней за 5 снежня, але ў сеціве з’явіўся сліў, што магло прывесці да заўчаснай афіцыйнай публікацыі відэа. «Наш трэйлер пратачыўся ў сеціва, таму, калі ласка, паглядзіце арыгінал на YouTube», — гаворыцца ў паведамленні кампаніі ў Х. Праз дзве гадзіны пасля публікацыі трэйлер набраў 6,7 млн праглядаў.

У сліве падазраюць сына аднаго з распрацоўшчыкаў GTA VI. Гэта не першая ўцечка. Самая маштабная адбылася ў 2022 годзе, калі былі злітыя некалькі дзясяткаў відэа ранняй зборкі GTA VI, а таксама скрыншоты і тысячы радкоў зыходнага кода праграмы. Rockstar Games пацвердзіла ўцечку даных.