Алеся Чапкевич world 28 верасня 2026, 13:50

Памылачка выйшла: злачынцы выкралі 20 тон пяску з фур з лагатыпам Nvidia

Злачынцы ў Каліфорніі выкралі два вялікія прычэпы з лагатыпамі Nvidia і стартапа PlusAI, са спадзевам зарабіць на дарагой электроніцы. Але пралічыліся, паведамляе Wired.

Пакінуць каментарый

Злачынцы ў Каліфорніі выкралі два вялікія прычэпы з лагатыпамі Nvidia і стартапа PlusAI, са спадзевам зарабіць на дарагой электроніцы. Але пралічыліся, паведамляе Wired.

Гісторыя здарылася ў мінулы чацвер у каліфарнійскім горадзе Н’юарк. Невядомыя пад’ехалі сваімі цягачамі да склада PlusAI, які разам з Nvidia распрацоўвае софт для аўтаномных грузавікоў, зрэзалі замкі на прычэпах, перачапілі іх і зніклі. Высокатэхналагічныя кабіны з усёй начынкай і сістэмай кіравання стаялі ўнутры закрытага склада, і выкрадальнікі вырашылі абмежавацца толькі фурамі з гучнымі брэндамі.

Авантура раскрылася выпадкова. Раніцай топ-менеджар PlusAI атрымаў паведамленне ад знаёмага са словамі, што той бачыў два грузавікі стартапа каля працы, і віншаваннямі з поспехам. Вось толькі ніякіх машын там быць не павінна было — паводле дакументаў, абодва прычэпы спакойна стаялі ў склада ў паўмілі адтуль. Кіраўніцтва адразу ж выклікала паліцыю.

Пагоня не спатрэбілася. Злодзеі самі кінулі прычэпы проста пасярод дарогі, як толькі адкрылі іх і зазірнулі ўнутр. У PlusAI патлумачылі, што выкарыстоўваюць прычэпы ў дарожных тэстах, а для імітацыі грузу засыпаюць у іх баласт. У кожным прычэпе было па 9 тон пяску. Зразумеўшы, што замест мільёнаў долараў у выглядзе чыпаў і сервераў яны выкралі танны будаўнічы матэрыял, злачынцы збеглі.

Кур’ёзны крадзеж адбыўся на фоне сапраўднага палявання за «жалезам» у ЗША. Злачынцы ўсё часцей нападалі на фуры з чыпамі, акумулятарамі Tesla і абсталяваннем для дата-цэнтраў, часам нават таранілі машыны суправаджэння. Гэтая гісторыя кончылася хэппі-эндам: ужо да абеду чацвярга абодва прычэпы шчасліва вярнуліся на склад PlusAI. Паліцыя вядзе расследаванне, арыштаў пакуль не было.