Па Amazon гуляюць жарты і чуткі пра вяртанне Безаса на пасаду гендырэктара

Мінулага тыдня цяперашні кіраўнік тэхнагіганта Эндзі Джэсі абвясціў, што замест 10 тысяч супрацоўнікаў будзе скарочана 18 тысяч. Абурэнне і расчараванне знайшло выйсце ў карпаратыўных каналах на тэму звальненняў у Slack. У адным з іх — на 26 тысяч удзельнікаў — супрацоўнікі кажуць, што Безасу варта вярнуцца і вырашыць праблемы, якіх у кампаніі цэлы букет. Скрыншоты трапілі ў распараджэнне Insider.

«Відавочна, нават Эндзі ў зоне рызыкі», — адзначыў адзін з супрацоўнікаў. Ён прымацаваў спасылку на нядаўняе інтэрв’ю CNBC спецыяліста інвестфонду Ritholtz Wealth Management, які спрагназаваў вяртанне Безаса сёлета. Безас перадаў пасаду Джэсі ў ліпені 2021-га і цяпер з’яўляецца выканаўчым старшынёй праўлення Amazon.

Amazon звальняе 18 тысяч чалавек

Па тэме

Amazon звальняе 18 тысяч чалавек

«Ён мае вярнуцца… ён найлепшы», — пісаў іншы супрацоўнік пра Безаса. Таксама ў чат адправілі фатаграфію ўсмешлівага Безаса з подпісам «Засумавалі за мной?» і выяву з подпісам «Вяртанне Караля».

«Нядзіўна, што пайшлі размовы пра вяртанне [Безаса]. Пэўна, пытае [Джэсі], якога чорта ты робіш з маёй кампаніяй», — напісаў хтосьці яшчэ.

Некаторых супрацоўнікаў вельмі абурыла падача навін пра звальненні цяперашнім гендырэктарам. Паводле слоў крыніц Insider, пра канкрэтныя планы было вядома не ўсім людзям нават на ўзроўні дырэктараў і віцэ-прэзідэнтаў. Некаторым не спадабаліся бестактоўныя карпаратыўныя рассылкі Джэсі — у адной з іх, на Дзень падзякі, ён заклікаў да стойкасці і аптымізму.

Сярод іншых вострых праблем Amazon — складаная іерархія кіравання, бюракратыя, інжынерная культура, якая псуецца, і ў цэлым карпаратыўная культура. Безас прасоўваў так званы падыход Day 1, сутнасць якога ў тым, што працаваць заўжды трэба з такім энтузіязмам, як быццам гэта першы дзень жыцця кампаніі — або ваш першы дзень у ёй. Некаторыя лічаць, што кампанія патроху скочваецца да культуры Day 2 паводле Безаса — ёй уласцівыя застой і абыякавасць, якія ў канчатковым выніку вядуць да гібелі кампаніі.