TechCrunch расказаў пра новы стартап з заснавальнікамі з Беларусі. Гэта сацсетка Yope для абмену фатаграфіямі ў прыватных групах, які за кароткі час прыцягнуў увагу моладзі і венчурных інвестраў.
Паводле слоў распрацоўшчыкаў, за апошнія паўгода аўдыторыя праграмы вырасла ў 30 разоў. Цяпер у яе 2,2 млн штомесячных актыўных карыстальнікаў і 800 тысяч — штодзённых. Ёсць яшчэ адная важная на вельмі няўстойлівым рынку метрыка — гэта ўтрыманне карыстальнікаў на 7 дзень, то-бок колькасць юзераў, якія адкрываюць праграму на працягу тыдня пасля ўсталёўкі. У Yope яна складае 40%.
Поспех сярод карыстальнікаў забяспечвае праграме цікавасць венчурных інвестараў. У пасяўным раўндзе Yope прыцягнула $4,65 млн пры ацэнцы ў $50 млн. Раўнд узначаліў фонд Goodwater Capital пры ўдзеле Inovo VC, Redseed і шэрагу бізнэс-анёлаў. Паводле слоў суразмоўцы выдання, Yope «зводзіць людзей і інвестараў з розуму», а некаторыя называюць яе «новым Instagram».
У Yope вельмі просты інтэрфейс. Карыстальнік можа зрабіць фота праз праграму або выбраць з галерэі і адправіць у чат, у які дадаўся або які стварыў сам. У чаце адлюстроўваюцца здымкі, якімі падзяліліся іншыя ўдзельнікі. Можна ставіць рэакцыі на фота і абмяркоўваць іх. Таксама ў кожнай групе ёсць «сцяна» — функцыя на базе АІ, якая абразае здымкі і склейвае ў бясконцы фотакалаж.
У праграмы ёсць шэраг функцый для павышэння ўцягнутасці карыстальнікаў, напрыклад, віджат для экрана блакавання, які дазваляе бачыць абнаўленні ў групе, функцыя, якая матывуе карыстальнікаў рэгулярна пасціць штосьці яшчэ, і функцыя паказу слайд-шоу. Гэтыя опцыі ў праграме можна — хоць і складана — выключыць.
Таксама ў Yope ёсць праграма заахвочвання за дапамогу ў прасоўванні і павелічэнні колькасці загрузак. Напрыклад, юзерам прапаноўваюць выплаты за публікацыі пра Yope у іншых сацсетках — TikTok і Instagram. Распрацоўшчыкі кажуць, што ролікі, створаныя такімі прамоўтарамі, ужо набралі больш за 56 млн праглядаў, але не ўдакладняюць, колькі прынеслі спамповак. 70-80% юзераў прыходзяць на запрашэнне тых, хто ўжо карыстаецца Yope.
Уласна стартап Yope быў заснаваны ў 2021 годзе выпускнікамі БДУ Байрамам Ісмаілавым, які займае пасаду гендырэктара, і Паўлам Рудкоўскім на пасадзе тэхнічнага дырэктара. У мінулым яны разам стварылі сацсетку-форум Salo (менавіта так спачатку называўся стартап) і фотапраграму — аналаг BeReal. У 2023 годзе фаўндары пераключыліся на відэападкасты і зноў півотнуліся ў верасні 2024-га.
Паводле слоў Ісмаілава, да наступнага года Yope збіраецца дасягнуць 59 млн MAU. Таксама ў праграме з’явіцца новы функцыянал. Напрыклад, цяпер ідзе праца над даданнем падтрымкі відэа. Яшчэ ў планах убудаваць штодзённыя напамінкі праверыць апдэйты ў групах і адрэагаваць на здымкі, Магчымасць посціць сцікеры на сцяне і маляваць, новыя фарматы (напрыклад, знікальныя фота) і не толькі. Таксама распрацоўшчыкі хочуць дадаць фармат сямейных груп, каб пашырыць ахоп пакаленняў. Цяпер сярэдні ўзрост карыстальнікаў Yope — 18 гадоў. Акрамя гэтага, распрацоўшчыкі збянтэжаныя манетызацыяй і прадумваюць тарыфы для падпіскі.
Каманда стартапа раскіданая па ўсім свеце — удзельнікі базуюцца ў Нью-Ёрку, Маямі, Лісабоне і Лондане, дзе знаходзіцца офіс Yope. Таксама стартап выбірае лакацыі для R&D-цэнтра.
TechCrunch адзначае, што групы могуць быць створаны ў WhatsApp, Snapchat і Instagram. Але ва ўсіх гэтых велізарных сацсетак зусім іншая базавая ідэя. Фішка Yope — выкласці фота ў закрытую групу і абмеркаваць яго з канкрэтнымі людзьмі. Ісмаілаў таксама называе адзнакай платформаў накшталт Instagram і Snapchat курыраванне кантэнту. Сэнс Yope у тым, каб карыстальнікі дзяліліся кантэнтам без фільтрацыі.
У Goodwater лічаць Yope прыкладам спажывецкіх праграм, якія адлюстроўваюць важны новы від сацыяльных паводзін. Ён дазваляе юзерам расказваць пра тое, што адбываецца ў іх жыцці вузкаму колу сяброў. А выбухны рост кажа пра сілу прадукту і каманды, адзначаюць у інвестфондзе.
Пытанне ў тым, ці зможа новая праграма ўтрымаць папулярнасць. BeReal, якую з часам скапіравала Meta, хапіла на год ці два, падкрэслівае TechCrunch. Пазней яе купіла кампанія Voodoo.
Рэлацыраваліся? Цяпер вы можаце каментаваць без верыфікацыі акаўнта.