Каманда Google DeepMind выпусціла мадэль Gemini Robotics 2. Галоўнае адрозненне новай версіі ад папярэднікаў — пераход ад кіравання выключна «верхняй паловай» робата да поўнага кантролю над усім яго целам, «ад ступняў да кончыкаў пальцаў».
Каманда Google DeepMind выпусціла мадэль Gemini Robotics 2. Галоўнае адрозненне новай версіі ад папярэднікаў — пераход ад кіравання выключна «верхняй паловай» робата да поўнага кантролю над усім яго целам, «ад ступняў да кончыкаў пальцаў».
Новая архітэктура сінхранізуе рухі, дазваляючы двухногім андроідам прысядаць, нахіляцца, цягнуцца і хадзіць, адначасова маніпулюючы аб’ектамі. У дэманстрацыйных відэа робат Apollo 2 ад кампаніі Apptronik лёгка згінаецца за лейкай для паліву кветак і знаходзіць патрэбныя рэчы на верхніх паліцах.
Распрацоўшчыкі дасягнулі прарыву ў дробнай маторыцы, адаптаваўшы мадэль пад складаныя пяціпалыя кісці. Цяпер робаты пад кіраваннем Gemini Robotics 2 здольныя выконваць задачы, якія раней патрабавалі чалавечай дакладнасці: зашпільваць пакецікі з зіплок-замком, завязваць смеццевыя пакеты і акуратна выкручваць лямпачкі. Хоць прадстаўнікі DeepMind прызнаюць, што роботам усё яшчэ не хапае хуткасці, яны называюць гэты рэліз ключавым этапам для выканання складаных рэальных задач, дзе патрэбна поўная каардынацыя цела.
Разам з базавым кантролерам абнавілася і візуальна-моўная сістэма прасторавага мыслення Gemini Robotics ER 2. Яна дапамагае машынам аналізаваць навакольнае асяроддзе і выконваць шматкрокавыя інструкцыі. Новая версія лепш утрымлівае фокус пры працяглых сцэнарыях працы і цяпер выразна разумее, калі задача толькі пачалася, а калі ўжо цалкам завершана. Больш за тое, ER 2 навучылі арганізоўваць камандную працу розных тыпаў машын: напрыклад, гуманоід Apollo 2 можа ў працэсе ўборкі гаража аддаваць прамыя ўказанні двухручнаму стацыянарнаму маніпулятару.
Асаблівы акцэнт Google зрабіла на бяспецы і аўтаномнасці. Gemini Robotics ER 2 стала самай бяспечнай мадэллю кампаніі: яна імгненна распазнае людзей побач і ўключае пратаколы экстраннага мяккага спынення, калі чалавек падыходзіць занадта блізка. А лакальная версія Gemini Robotics On-Device, якая працуе непасрэдна на жалезе робата без падключэння да інтэрнэту, цяпер умее за лічаныя хвіліны адаптавацца да зусім новых тыпаў карпусоў — з прынцыпова іншай формай, наборам сэнсараў і ступенямі свабоды.
Рэлацыраваліся? Цяпер вы можаце каментаваць без верыфікацыі акаўнта.