Прыёр спыніць аперацыі ў USD праз Citibank. У айцішнікаў ужо цяпер праблемы

Прыёрбанк разаслаў частцы кліентаў-юрасоб паведамленні пра спыненне доларавых аперацый па карэспандэнцкім рахунку ў Citibank NA ад 15 мая.

Банк рэкамендуе выбраць са спісу іншы банк-карэспандэнт, а таксама разгледзець «магчымасць міжнародных плацяжоў па знешнегандлёвых кантрактах у іншых валютах».

Такое апавяшчэнне ў інтэрнэт-банкінгу атрымаў наш чытач, паведамленні такога ж зместу абмяркоўваюць карыстальнікі форума «Анлайнер».

У спісе банкаў-карэспандэнтаў, да якога адсылае Прыёрбанк, пяць банкаў, якія працуюць з доларам, — кітайскі, два азербайджанскія, армянскі і казахстанскі. Але ўсе яны маюць абмежавальныя пазнакі: кітайскі прымае плацяжы толькі на карысць атрымальнікаў з КНР, астатнія — толькі на карысць сваіх кліентаў. 

Між тым чытач dev.by, ІП, сцвярджае, што ўжо цяпер не можа вывесці USD з пляцовак-рэсэлераў PayPro Global і FastSpring.

— На практыцы ўжо цяпер грошы не даходзяць, — кажа ён. — Вяртаюцца на рахунак. У плацежках пішуць, што bank disabled. Дагэтуль усё праходзіла паспяхова штомесяц.

У якасці часовага вырашэння праблемы чытач плануе адкрыць рахунак у банку РБ, дзе доларавыя плацяжы яшчэ магчымыя.

— Але зразумела, што гэта ненадоўга. А глабальны план — заводзіць рахунак у іншай краіне. Што праўда, дробным ІП з абаротам 4-10К на месяц гэта не так проста. Патрэбны рахунак юрыдычнай асобы, а гэта рэгістрацыя кампаніі ды іншыя выдаткі.

Яшчэ адзін чытач, які атрымаў такое ж апавяшчэнне ад Прыёрбанка, расказаў, што не змог атрымаць доларавы плацеж ад кліента з Вялікабрытаніі.

— Кліент адправіў плацеж у USD на Прыёр з UK 20 дзён таму, — падзяліўся ён. — Грошы вярнулі на рахунак кліента. У плацежцы, пільнуючыся рэкамендацый, пазначалі ўсе неабходныя дэталі.

На сайце Прыёрбанка афіцыйных апавяшчэнняў пра спыненне доларавых аперацый па карэспандэнцкім рахунку ў Citibank NA пакуль няма. У самім банку інфармацыі не каментуюць, называюць яе канфідэнцыйнай і просяць кліентаў-юрасоб звяртацца па кансультацыю да персанальнага менеджара.

Выходныя SWIFT-пераказы ў доларах і еўра Прыёрбанк прыпыніў яшчэ ў лістападзе 2022 года. Адпраўленне даступнае толькі ў расійскіх рублях, тэнге, юанях, злотых, фунтах, швейцарскім франку і шведскай кроне, мінімальная сума пераказу — 10 тысяч долараў у эквіваленце. На атрыманне SWIFT-пераказаў, як сцвярджаюць у банку, «з боку Прыёрбанка абмежаванняў няма». На сайце ў пераліку валют, даступных да залічэння, ёсць EUR, але няма USD.

12 красавіка Прыёрбанк паведаміў пра ўвядзенне санкцый урада Канады. Банк спыніў прыманне плацежных даручэнняў на адрас канадскіх банкаў, «каб пазбегнуць замарозкі грашовых сродкаў», атрымальнікам грошай з Канады рэкамендавана перанакіраваць плацяжы ў іншыя банкі.

У лютым стала вядома, што міністэрства фінансаў ЗША пачало расследаванне ў дачыненні да ўладальніка Прыёрбанка — Raiffeisen Bank International — у сувязі з яго бізнэсам у Расіі.

Вы можаце падтрымаць dev.by рознымі спосабамі, напрыклад, хуткім данатам проста цяпер.

SWIFT-пераказы праз беларускі Альфа-Банк падаражэлі ў 3-5 разоў

Па тэме

SWIFT-пераказы праз беларускі Альфа-Банк падаражэлі ў 3-5 разоў