Аддзел навін 22 лістапада 2024, 18:30

Беларус атрымаў у Польшчы праязны дакумент замежніка з яшчэ сапраўдным пашпартам. Даведаліся, як яму ўдалося

Мы расказвалі гісторыю беларускі, якая змагла ўладкавацца на працу ў Польшчы з праязным дакументам замежніка. Яна таксама згадала, што яе муж нядаўна лётаў з аналагічным дакументам на Lufthansa і «ніякіх праблем не ўзнікла».

З каналам Dzik Pic, які першапачаткова апублікаваў гэтую гісторыю, звязаўся муж гераіні. Ён расказаў, што яму ўдалося атрымаць праязны дакумент з яшчэ дзейным пашпартам на руках.

1 каментарый

Мы расказвалі гісторыю беларускі, якая змагла ўладкавацца на працу ў Польшчы з праязным дакументам замежніка. Яна таксама згадала, што яе муж нядаўна лётаў з аналагічным дакументам на Lufthansa і «ніякіх праблем не ўзнікла».

З каналам Dzik Pic, які першапачаткова апублікаваў гэтую гісторыю, звязаўся муж гераіні. Ён расказаў, што яму ўдалося атрымаць праязны дакумент з яшчэ дзейным пашпартам на руках.

«На момант майго палёту ў мяне на руках былі тры дакументы»

— Ёсць некалькі цікавых фактаў. Па-першае, мне зрабілі польскі праязны дакумент пры дзейным пашпарце, ды яшчэ і не згубленым.

Мой пашпарт быў выдадзены ў 2011 годзе тэрмінам дзеяння да 2031 года. То-бок ён сапраўдны, але яму больш за дзесяць гадоў, і ніводная краіна не праставіць у яго візу.

Я баяўся, што мяне не пусцяць на борт самалёта з такім пашпартам, таму звярнуўся па польскі праязны дакумент.

Дзяўчына ў акенцы спачатку ветліва сказала, што не можа прыняць маю заяву, бо «для нас пашпарт сапраўдны».

Я яшчэ раз падрабязна выклаў сваю логіку, спаслаўся на прэцэдэнт з польскай гуманітарнай візай, якую з прычыны старога, фармальна сапраўднага пашпарта выдалі на асобным аркушы паперы.

Дзяўчына прапанавала дапоўніць мой тлумачальны ліст і ўзяла маю заяву, адзначыўшы, што, вядома, рашэнне будзе на меркаванне ваяводы.

У выніку на момант майго палёту ў мяне на руках былі тры дакументы: карта побыты, якая мінала праз тры дні, мой дзіўны пашпарт і новенькі праязны дакумент.

Якім жа было маё здзіўленне, калі ўсе прайшлі на пасадку, быццам у гарадскі аўтобус. Ніякіх дакументаў наогул не спатрэбілася.

Ані ў варшаўскім аэрапорце, ані ў Германіі ніякіх дакументаў не спыталі. Я, абкладзены ўсімі магчымымі паперкамі, быў у шоку.

Так, дарэчы, я рыхтаваўся да адмовы ад ваяводы. Будучы напалоханым узмоцненым міграцыйным кантролем у Германіі, я не хацеў, каб у мяне там узніклі праблемы.

Я напісаў у нямецкую федэральную міграцыйную паліцыю, пазначыўшы ўсе абставіны і апісаўшы сітуацыю з пашпартам. Вось што мне адказалі: «Вы грамадзянін Беларусі з дазволам на жыхарства ў Польшчы. Калі ваш дазвол на жыхарства прызнаецца на ўсёй тэрыторыі Шэнгенскай зоны, вы можаце скарыстацца правамі на паездкі ў адпаведнасці з Шэнгенскай канвенцыяй. Дастаткова, калі дазвол на жыхарства сапраўдны ў часе вашага знаходжання ў Германіі».