Бум вакол штучнага інтэлекту падняў ацэнкі амерыканскіх тэхкампаній да ўзроўняў, блізкіх да піку бурбалкі доткамаў. Аўтары блога Еўрапейскага цэнтральнага банка лічаць, што карэкцыя рынку ў нейкі момант верагодная, нават калі ШІ сапраўды апраўдае чаканні інвестараў.
Бум вакол штучнага інтэлекту падняў ацэнкі амерыканскіх тэхкампаній да ўзроўняў, блізкіх да піку бурбалкі доткамаў. Аўтары блога Еўрапейскага цэнтральнага банка лічаць, што карэкцыя рынку ў нейкі момант верагодная, нават калі ШІ сапраўды апраўдае чаканні інвестараў.
Эканамісты і даследчыкі ЕЦБ прааналізавалі цяперашні рост тэхналагічнага рынку і параўналі яго з папярэднімі тэхналагічнымі рэвалюцыямі — развіццём чыгунак, электрычнасці, радыё ды інтэрнэту.
«Эканамічныя даследаванні мінулых тэхналагічных рэвалюцый указваюць на трывожную выснову: карэкцыя цяперашніх ацэнак фондавага рынку верагодная», — гаворыцца ў публікацыі. Пры гэтым аўтары падкрэсліваюць, што дакладны момант падзення прадказаць немагчыма.
Даследчыкі разглядаюць два сцэнарыі таго, што адбываецца. Згодна з першым, высокія ацэнкі тэхналагічных кампаній могуць быць рацыянальнымі: інвестары робяць стаўку на тэхналогію з вялікім, але пакуль нявызначаным патэнцыялам. Напрыклад, акцыі Nvidia з 2022 года выраслі прыкладна ў 20 разоў на чаканнях, што кампанія стане адным з галоўных бенефіцыяраў ШІ-буму.
Але нават калі ШІ апынецца сапраўды рэвалюцыйнай тэхналогіяй і прыбыткі кампаній працягнуць расці, катыроўкі ўсё роўна могуць знізіцца. Па меры распаўсюджвання тэхналогіі звязаныя з ёй рызыкі пачынаюць закранаць ужо не асобныя кампаніі, а ўсю эканоміку, праз што інвестары патрабуюць больш высокай прэміі за рызыку.
Другі сцэнарый мяркуе, што рынак дадаткова разганяюць залішне аптымістычныя інвестары. У такім выпадку цэны могуць адарвацца ад фундаментальных паказчыкаў, а пасля знікнення эйфарыі падзенне апынецца яшчэ больш рэзкім.
«Абодва падыходы прадугледжваюць бум, за якім у нейкі момант пойдзе карэкцыя або адкат ад дасягнутых ацэнак», — пішуць аўтары. Пры гэтым яны не сцвярджаюць, што цяперашнія цэны ўжо дасягнулі максімуму: калі ШІ апынецца дастаткова значнай тэхналогіяй, акцыі могуць працягнуць расці і перад будучай карэкцыяй.
Асабліва моцна магчымае падзенне амерыканскіх тэхналагічных кампаній можа закрануць Еўропу. Хатнія гаспадаркі еўразоны трымаюць каля €440 мільярдаў у акцыях «цудоўнай сямёркі» — Alphabet, Amazon, Apple, Meta, Microsoft, Nvidia і Tesla. Параўнальныя сумы знаходзяцца ў страхавых кампаній і пенсійных фондаў. Значная частка гэтых укладанняў зроблена праз ETF ды іншыя інвестыцыйныя фонды.
Аўтары лічаць найбольш небяспечным сцэнарыем не само падзенне акцый, а яго спалучэнне з больш шырокім крызісам на фінансавых рынках. У адрозненне ад часоў бурбалкі доткамаў, улады цяпер маюць менш магчымасцяў рэзка зніжаць стаўкі або нарошчваць дзяржаўныя выдаткі для змякчэння наступстваў.
Рэлацыраваліся? Цяпер вы можаце каментаваць без верыфікацыі акаўнта.