Штучны інтэлект можа павысіць узровень жыцця большасці людзей, аднак асноўныя выгады ад тэхналогіі дастануцца вузкай групе распрацоўшчыкаў і інвестараў, заявіў генеральны дырэктар Palantir Алекс Карп.
Штучны інтэлект можа павысіць узровень жыцця большасці людзей, аднак асноўныя выгады ад тэхналогіі дастануцца вузкай групе распрацоўшчыкаў і інвестараў, заявіў генеральны дырэктар Palantir Алекс Карп.
У інтэрв’ю кіраўніку Axel Springer Матыясу Дзёпфнеру Карп сказаў, што разрыў паміж звычайнымі карыстальнікамі ШІ і тымі, хто непасрэдна ўдзельнічае ў яго стварэнні, будзе значна большым, чым падчас папярэдніх тэхналагічных рэвалюцый.
«Узровень жыцця сярэдняга чалавека вырасце, але людзі, якія займаюцца гэтай тэхналогіяй, верагодна, стануць у дзесяць або сто разоў багацейшымі, чым цяпер», — сказаў ён, назваўшы маёмасную няроўнасць вакол ШІ «галоўнай праблемай» ЗША.
Карп параўнаў тое, што адбываецца, з мінулым, калі даходы радавых работнікаў маглі падвоіцца, а стан галоўных бенефіцыяраў — вырасці ў пяць разоў. Цяпер жа, паводле яго, ШІ стварае «поўны разрыў» паміж умераным ростам дабрабыту большасці і «неймаверным багаццем» невялікай групы людзей.
«Цяпер адбываецца рэвалюцыя, у выніку якой я сам магу стаць у дваццаць разоў багацейшым», — адзначыў кіраўнік Palantir.
Карп таксама раскрытыкаваў кіраўнікоў вядучых ШІ-кампаній за змрочныя прагнозы адносна будучыні рынку працы. Ён не назваў канкрэтных імёнаў, аднак раней аб магчымых масавых скарачэннях казалі кіраўнікі OpenAI і Anthropic Сэм Альтман і Дарыё Амадэй.
«Людзі, якія кіруюць лабараторыямі, самі казалі вам, што гэта праўда. Яны распавядаюць, што ваша жыццё стане жахлівым. Пры гэтым самі яны хутка багацеюць і не здаюцца вам асабліва сімпатычнымі», — заявіў Карп.
На ягоную думку, ШІ-індустрыя залішне рэкламуе тэхналогію як крыніцу ўсеагульнага росквіту, хаця выгады і рызыкі размяркуюцца няроўнамерна.
«Залішні продаж ШІ ў гэтай краіне сапраўды выклікае трывогу. І гэта яшчэ і засмучае, таму што ў ёй няма неабходнасці», — сказаў Карп, назваўшы ШІ «прыродным рэсурсам», які здольны прыносіць як карысць, так і шкоду.
Ён таксама рэзка выказаўся пра лідараў ШІ-гонкі: «Гэта вельмі дзіўныя экзэмпляры з высокім IQ, якіх вы, верагодна, не захацелі б запрашаць на вячэру. А калі б запрасілі, вам не было б пра што з імі гаварыць. І, дарэчы, наадварот».
Рэлацыраваліся? Цяпер вы можаце каментаваць без верыфікацыі акаўнта.