На гэтым тыдні ўзніклі перабоі ў рабоце ШІ-інструментаў Claude, і некаторыя распрацоўшчыкі сутыкнуліся з немагчымай задачай — пісаць код уручную.
На гэтым тыдні ўзніклі перабоі ў рабоце ШІ-інструментаў Claude, і некаторыя распрацоўшчыкі сутыкнуліся з немагчымай задачай — пісаць код уручную.
У панядзелак карыстальнікі пачалі масава скардзіцца на збоі ў сервісах Anthropic. На статуснай старонцы Claude паведамлялася пра павелічэнне памылак: людзі не маглі зайсці ні на Claude.ai, ні ў Claude Code. Праблемы працягваліся ў аўторак, а ў сераду ўсё пачынілі.
Збой паказаў адразу дзве рэчы: наколькі папулярным Claude стаў сярод распрацоўшчыкаў, і наколькі многія з іх ужо ад яго залежаць пры напісанні і выпраўленні кода.
Сеньёр з Meta Гаурэш Пандзіт расказаў Business Insider, што інструменты кшталту Claude вельмі хутка ўбудаваліся ў штодзённую працу інжынераў. Калі сэрвіс лёг, ён проста пераключыўся на іншыя задачы — не звязаныя з кодам. Па яго словах, пісаць код уручную было б даўжэй: «Справа не ў тым, што навык кудысьці знік. Проста цяпер нават для самых простых рэчаў лягчэй скарыстацца LLM — гэта як адна кнопка: націснуў, і задача зроблена».
Дзясяткі карыстальнікаў Claude пісалі на Reddit і Discord, што самі не чакалі, наколькі прывыклі да такіх інструментаў. «Збой Claude адчуваецца нашмат мацней, калі разумееш, што ўжо аддаў яму палову свайго мозга», — адзначыў адзін. «Што ж, прыйдзецца пісаць код як пячорны чалавек», — пажартаваў іншы. У некага збой Claude «зламаў стартап».
ШІ ужо перавярнуў распрацоўку софта. З аднаго боку, праграмісты кажуць, што такія інструменты заўважна павышаюць прадуктыўнасць. З іншага — скардзяцца, што працы стала больш. Пры гэтым становіцца менш вакансій для джуноў. Некаторыя бігтэхі выкарыстанне ШІ ужо пачалі ўлічваць у перфоманс-рэвью. Але ў цэлым кіраўнікі перажываюць, што ў працаўнікоў могуць паступова атрафавацца навыкі, калі занадта залежаць ад ШІ.
Кіраўнік Claude Code Барыс Чорны ў панядзелак напісаў у X, што збоі адбыліся з-за «рэзкага росту колькасці карыстальнікаў, які перагрузіў сэрвісы». Усплёск адбыўся на фоне канфлікту Anthropic з Пентагонам і ўгоды, якую заключыла з ведамствам OpenAI. У аплікацыі Claude узляцелі загрузкі, а ў ChatGPT у 4 разы падскочыла колькасць выдаленняў.
Claude Code вельмі папулярны сярод распрацоўшчыкаў. Яго выкарыстоўваюць, напрыклад, інжынеры Meta, Netflix, Salesforce і Accenture. Былы менеджар Uber Гергей Арос нядаўна апытаў амаль тысячу падпісчыкаў пра тое, якімі ШІ-інструментамі яны карыстаюцца. Claude Code апынуўся на першым месцы. «Сёння Claude Code распаўсюджаны ў нашым апытанні амаль гэтак жа шырока, як быў GitHub Copilot тры гады таму», — напісаў ён. Адзін з распрацоўшчыкаў, з якім размаўляў Business Insider, таксама расказаў, што аддае перавагу Claude альтэрнатывам ад Google і xAI. «Я нават не заўважаў, наколькі людзі (уключаючы мяне) паспелі стаць залежнымі ад ШІ за такі кароткі час — пакуль не здарыўся збой Claude», — адзначаў ён.
Релоцировались? Теперь вы можете комментировать без верификации аккаунта.