Гейтс расказаў пра дзіцячую звычку, якая дапамагла яму дамагчыся поспеху

«Калі я не мог супакоіцца або мне было сумна — або мяне каралі за дрэнныя паводзіны, — я знікаў у сваім пакоі і з галавой сыходзіў у кнігі або ідэі, часта праводзячы так гадзіны напралёт. Гэтая здольнасць запаўняць час гультайства глыбокімі разважаннямі і вучобай стала важнай часткаю маёй асобы», — напісаў Гейтс.

Ён дадаў, што гэтая звычка «перадвызначыла яго далейшы поспех».

У тым жа блогпасце мільярдэр расказвае пра кнігу «Тhe Anxious Generation» сацыяльнага псіхолага Джонатана Хайта. Яна прысвечаная праблеме смартфонаў і сацсетак, якія трансфармуюць дзіцячы мозг. Аўтар таксама сцвярджае, што гэтыя тэхналогіі шкодзяць псіхіцы дзяцей і што яны ўсё больш адчуваюць сябе самотнымі і схільнымі да дэпрэсіі. Акрамя таго, даследаванні паказваюць, што пастаяннае выкарыстанне негатыўна ўплывае на памяць і канцэнтрацыю ўвагі. Гейтс дадае, што пастаянныя адцягвальныя фактары і прырода сацсетак, якія выклікаюць прывыканне, вельмі абцяжарваюць развіццё ўвагі.

У мінулым Гейтс не раз згадваў, што сваім поспехам абавязаны любові да чытання і здольнасці сыходзіць у самаізаляцыю. У 1990-х у яго быў звычай раз на год на тыдзень адасабляцца ў доме на прыродзе, захапіўшы з сабой толькі «велізарную сумку з кнігамі і тэхнічнымі дакументамі». Гэта былі перыяды максімальнага засяроджвання, калі ён не правяраў электроннай пошты, каб спакойна «чытаць, думаць і пісаць пра будучыню». Гэта дапамагала яму генераваць маштабныя ідэі — накшталт неабходнасці распрацаваць браўзер у Microsoft. Сёння ж тэхналогіі пазбаўляюць людзей шанца факусавацца і разважаць глыбока, што крытычна неабходна для стварэння інавацый, лічыць Гейтс.