Сёння пачынаецца суд у справе «Тут Бай Медыя». Ён будзе закрытым

Белта паведамляе, што судзяць пяць былых працаўніц ТАА «Тут Бай Медыя»: гендырэктара Людмілу Чэкіну, галоўную рэдактарку Марыну Золатаву, рэдактарку палітыка-эканамічных навін Вольгу Лойка, рэдактарку Алену Талкачову і юрысконсультку Кацярыну Ткачэнка.    

Пад вартай знаходзяцца Чэкіна і Золатава. У дачыненні да Лойка, Талкачовай і Ткачэнка абраная мера стрымання ў выглядзе асабістай парукі. Белта піша, што «ў судзе іх прысутнасць не чакаецца».   

У чым абвінавачваюць супрацоўніц «Тут Бай Медыя»

Паводле інфармацыі расійскага выдання sputnik.by, матэрыялы справы складаюць 180 тамоў. 

Людмілу Чэкіну абвінавачваюць ва ўхіленні ад выплаты падаткаў, арганізацыі здзяйснення злачынстваў па распальванні іншай сацыяльнай варожасці, а таксама распаўсюдзе матэрыялаў, якія ўтрымліваюць публічныя заклікі да дзеянняў па прычыненні шкоды нацыянальнай бяспецы Беларусі і кіраванні імі. 

Марына Золатава абвінавачваецца ва ўхіленні ад выплаты сум падаткаў, распаўсюдзе матэрыялаў, якія змяшчаюць публічныя заклікі да дзеянняў, накіраваных на прычыненне шкоды нацыянальнай бяспецы Беларусі, а таксама распальванні іншай сацыяльнай варожасці.

Вольгу Лойка і Алену Талкачову абвінавачваюць у дапамаганні ва ўхіленні ад выплаты сум падаткаў у асабліва буйным памеры, наўмысных дзеяннях, накіраваных на ўзбуджэнне іншай сацыяльнай варожасці па прыкмеце іншай сацыяльнай прыналежнасці, учыненых групай асоб, а таксама ў публічных закліках да захопу ўлады, накіраваных на прычыненне шкоды нацыянальнай бяспецы Беларусі, з выкарыстаннем СМІ. 

Кацярына Ткачэнка абвінавачваецца ў дапамаганні ва ўхіленні ад выплаты сум падаткаў у асабліва буйным памеры, актыўным удзеле ў групавых дзеяннях, якія груба парушаюць грамадскі парадак.

Справа TUT. Перадгісторыя 

• 18 мая 2021 года Дэпартамент фінансавых расследаванняў КДК прыйшоў з ператрусамі ў офісы «Тут Бай Медыя», hoster.by, у кватэры супрацоўнікаў партала. Былі затрыманыя каля 20 чалавек — кіраўніцтва і працаўнікі «Тут Бай Медыя», супрацоўнікі афіляваных з «Тут Бай Медыя» кампаній (hoster.by, av.by, tam.by). 
• Сайт быў заблакаваны. Да блакавання тутбай быў найбуйнейшым навінным парталам Беларусі. На месяц яго наведвалі 3,3 млн чытачоў (паводле даных Gemius).
• 19 мая намеснік начальніка трэцяга ўпраўлення ДФР КДК Беларусі Аляксандр Пракапенка патлумачыў у эфіры АНТ сутнасць прэтэнзій да кампаніі: рэзідэнт ПВТ «выкарыстоўваў чужы спецыялізаваны софт, атрымліваў выручку за кошт гэтай дзейнасці, што з’яўляецца недапушчальным для рэзідэнтаў». У выніку ТАА нібыта ўхілілася ад выплаты падаткаў, сума шкоды «вылічаецца мільёнамі долараў ЗША».
• На тэлеканале «Беларусь 1» удакладнілі, які менавіта чужы софт, паводле версіі следства, выкарыстоўвала кампанія — «расійскую лічбавую платформу». Верагодна, Яндэкс. Гэтую ж здагадку dev.by выказаў Кірыл Валошын. Пры гэтым ён падкрэсліў, што «пераважная большасць раздзелаў партала, а іх больш за 20, распрацаваныя і падтрымліваюцца самастойна».
• Пазней быў абнародаваны ліст адміністрацыі ПВТ на адрас «Тут Бай Медыя» ад 16 лістапада 2019. З дакумента вынікае, што рэзідэнты самі вызначаюць, што распрацоўваць, і што працэнт распрацоўкі можа быць нават 1%.
• dev.by таксама знайшоў звесткі Белстата, з якіх вынікае, што да 85% выдаткаў рэзідэнтаў ПВТ на софт — гэта замежнае праграмнае забеспячэнне.
• «Тут Бай Медыя» пазбавілі падатковых ільгот ПВТ, а затым і выключылі з Парка. 
• 13 жніўня 2021 года суд Цэнтральнага раёна Мінска прызнаў тутбай і яго сацыяльныя сеткі экстрэмісцкімі. Гэтае ж рашэнне закранула і новы праект і яго сацсеткі.
• У кастрычніку 2021 года стала вядома пра новую крымінальную справу: працаўнікоў «Тут Бай Медыя» падазраюць у распальванні варожасці.

На працягу 2022 года большасць былых працаўнікоў «Тут Бай Медыя» выйшлі на волю. Некаторым з іх была змененая мера стрымання.   

Студзень 2022 года. З-пад хатняга арышту вызвалілі Юлію Чарняўскую, удаву заснавальніка тутбая Юрыя Зісера.   

Сакавік 2022 года. З СІЗА № 1 на вуліцы Валадарскага на волю выйшлі намесніца галоўнага бухгалтара Марыя Новік, намесніца гендырэктара Ірына Рыбалка, галоўная бухгалтарка Анжэла Асад. Пазней з-пад варты была вызваленая Вольга Лойка, рэдактарка палітыка-эканамічнага блока навін. А таксама намеснік гендырэктара па тэхнічных пытаннях Аляксандр Дайнека і менеджар Андрэй Аўдзееў. Ім змененая мера стрымання, яны па-ранейшаму фігуранты крымінальнай справы.    

25 красавіка 2022 года. На волю з залы суда выйшла дырэктарка RocketData Дар’я Данілава. Яе прызналі вінаватай у арганізацыі і падрыхтоўцы дзеянняў, якія груба парушаюць грамадскі парадак, альбо актыўным удзеле ў іх (арт. 342 КК РБ). Прысудзілі адзін год і чатыры месяцы пазбаўлення волі, улічылі тэрмін у СІЗА і адпусцілі.

13 мая — на свабоду, але ўсё яшчэ ў якасці абвінавачванай, выйшла галоўная інжынерка партала Ала Лапатка.  

18 ліпеня 2022 года. З СІЗА выйшла журналістка Алена Талкачова.

У СІЗА знаходзяцца генеральная дырэктарка Людміла Чэкіна і галоўная рэдактарка Марына Золатава.

Вспоминаем Юрия Анатольевича Зиссера. Ревью

По теме

Вспоминаем Юрия Анатольевича Зиссера. Ревью

Тутбай. Проект длиной в историю независимой Беларуси

По теме

Тутбай. Проект длиной в историю независимой Беларуси