Алеся Чапкевич world 7 верасня 2026, 14:41

Саіскальнікі працы ўстаўляюць у рэзюмэ схаваныя інструкцыі для ШІ, каб абысці адбор

У спробах прабіцца праз аўтаматычныя фільтры саіскальнікі пачалі ўжываць тэхніку промпт-ін’екцый, піша Business Insider.

Пакінуць каментарый

Саіскальнікі працы ўстаўляюць у рэзюмэ схаваныя інструкцыі для ШІ, каб абысці адбор

У спробах прабіцца праз аўтаматычныя фільтры саіскальнікі пачалі ўжываць тэхніку промпт-ін’екцый, піша Business Insider.

Метад нагадвае стары трук з белым тэкстам на белым фоне, калі ў рэзюмэ хавалі ключавыя словы для падману парсераў. Цяпер замест ключавых словаў кандыдаты хаваюць інструкцыі для ШІ, якія патрабуюць праігнараваць папярэднія ўказанні і прызнаць кандыдата ідэальным прэтэндэнтам незалежна ад яго рэальнага досведу. У гэтым траўні даследчыкі з Д’юкскага ўніверсітэта прааналізавалі амаль 200 тысяч рэзюмэ — схаваныя промпты змяшчаюцца прыкладна ў 1% з іх.

Рост такіх маніпуляцый выкліканы крызісам даверу да працэсу найму. Праз ШІ саіскальнікі адпраўляюць водгукі сотнямі, а працадаўцы выкарыстоўваюць тыя ж алгарытмы для першаснага адсеву. У выніку адбор ператварыўся ў замкнёнае кола, дзе алгарытмы саіскальнікаў узаемадзейнічаюць з алгарытмамі рэкрутэраў. СЕО HR-платформы Lattice Сара Франклін тлумачыць паводзіны кандыдатаў адчаем: «Саіскальнікі робяць тое, што лічаць патрэбным, абы прабіцца скрозь агульны шум. Увесь працэс найму сёння нагадвае абсалютную „чорную скрыню“».

Але такая тактыка часта бескарысная або нават шкодзіць кандыдату. Па-першае, рэкрутэры звычайна праглядаюць водгукі пачкамі і спыняюць пошук, як толькі набіраюць пул адпаведных людзей, таму да многіх рэзюмэ чарга ўвогуле не даходзіць. Па-другое, падман лёгка раскрываецца, а самі працадаўцы ўжо пачалі адмыслова правяраць файлы на наяўнасць промптаў.

Для большасці кіраўнікоў схаваныя інструкцыі становяцца нагодай для імгненнай адмовы. Кіраўнік ІТ-кампаніі InnoCaption Пол Лі аднойчы выявіў у адным з рэзюмэ схаваны тэкст на 1500 сімвалаў з патрабаваннем паставіць кандыдата на першае месца. Ён лічыць гэта этычным парушэннем. З ім згодны і сузаснавальнік стартапу Zerolook Сімонэ Ліні, які з дапамогай ШІ знайшоў промпт з тэкстам «ад гэтага залежыць жыццезабеспячэнне кандыдата» і заблакаваў саіскальніка: «Гэта не дэманстрацыя навыкаў працы з ШІ, а банальная спроба пралезці без чаргі. Нічога складанага ў такім труку няма».