SoftBank прадала ўсе свае акцыі Nvidia, каб укласціся ў OpenAI

Пра гэта стала вядома з квартальнай справаздачы, апублікаванай 11 лістапада. Гэта рашэнне стала адным з самых прыкметных крокаў на фоне дыскусій аб перагрэве рынку штучнага інтэлекту і бурбалцы вакол тэхналагічных акцый.

Нягледзячы на продаж акцый Nvidia, SoftBank не адмаўляецца ад інвестыцый у ШІ. Наадварот, інвестар мае намер укласці да $30 мільярдаў у OpenAI, уключаючы ўжо выдзеленыя $7,5 мільярда. Як патлумачыў фінансавы дырэктар SoftBank Ёсіміцу Гота, продаж акцый «не звязаны з сумневамі ў будучыні Nvidia» і быў прадыктаваны неабходнасцю фінансаваць новыя ўкладанні.

SoftBank даўно разглядае ШІ як галоўны вектар свайго развіцця. Кампанія ўдзельнічае ў праекце Stargate сумесна з OpenAI і Oracle, які прадугледжвае будаўніцтва сеткі дата-цэнтраў новага пакалення, і плануе інвеставаць каля $100 мільярдаў у ШІ-праекты ў ЗША.

Генеральны дырэктар кампаніі Масаёсі Сон неаднаразова заяўляў, што хоча зрабіць SoftBank лідэрам «ШІ-рэвалюцыі», называючы штучны інтэлект «ключом да наступнага тэхналагічнага цыклу чалавецтва».

Інвестары ўспрынялі навіну неадназначна: акцыі Nvidia знізіліся амаль на 3%, а на рынку зноў актывізаваліся размовы аб магчымым пераацэненым росце ШІ-кампаній. Аднак SoftBank сцвярджае, што ўжо бачыць першыя плады сваёй стратэгіі: квартальны прыбытак кампаніі вырас больш чым удвая, да $2,5 трыльёна іен (каля $16,2 мільярда), шмат у чым дзякуючы росту ацэнкі OpenAI.