Супрацоўнікі Microsoft гатовыя сысці, калі будзе альтэрнатыўны офер: унутранае апытанне паказала, што настрой падае

У маі застацца ў кампаніі пры наяўнасці альтэрнатывы былі гатовыя толькі 47% рэспандэнтаў — яшчэ ў лістападзе лаяльных рэдмандскай кампаніі было 70%. Прадстаўнік Microsoft паставіў пад сумнеў лічбы ў распараджэнні Insider, але пагадзіўся, што працэнт тых, хто адказаў станоўча на пытанне, ці заставацца, ці не, сапраўды ўпаў.

Паводле даных Microsoft, у сярэднім у апытанні штодня бярэ ўдзел каля 400 супрацоўнікаў. Яе штат налічвае каля 200 тысяч чалавек.

Напярэдадні апошняга апытання Microsoft абвясціла, што сёлета не будзе даваць павышэння, а таксама паменшыць памер бонусаў і выплат акцыямі. У студзені тэхнагігант анансаваў маштабныя скарачэнні, якія закранулі нават супрацоўнікаў яго ключавога, воблачнага бізнэсу.

Паводле слоў супрацоўнікаў, настрой у кампаніі цяпер на дне і «святла ў канцы тунэлю» пакуль не відаць, а ад менеджменту прыходзяць імэйлы толькі з дрэннымі навінамі. Для параўнання, летась Microsoft абяцала даплаты, каб павысіць прывабнасць на фоне канкурэнтаў.