Аддзел навін 27 чэрвеня 2024, 11:22

SpaceX зоймецца вывадам МКС з арбіты амаль за $1 млрд

NASA даручыла SpaceX распрацоўку і запуск буксіра, які звядзе з арбіты Міжнародную касмічную станцыю пасля заканчэння тэрміну эксплуатацыі ў 2030 годзе.

На рэалізацыю праекта кампанія Ілана Маска атрымае $843 млн. Карабель забяспечыць кантраляваны сход МКС без рызыкі для населеных раёнаў.

Замест МКС у NASA плануюць перайсці на менш буйныя прыватныя касмічныя станцыі, якія будуць размяшчацца бліжэй да планеты на нізкай калязямной арбіце. Чакаецца, што яны запрацуюць для кліентаў як з прыватнага, так і з дзяржсектара пры канцы гэтага дзесяцігоддзя.

МКС была запушчаная ў 1998 годзе. Канструкцыя масай 420 тон і памерам прыкладна з футбольнае поле кіруецца пяццю касмічнымі агенцтвамі ў ЗША, Канадзе, Еўропе, Японіі і Расіі.