Спрэчная функцыя Recall навучылася аналізаваць працоўны стол у Windows 11

У бэта-зборцы Windows 11 пад нумарам 26236.5000 функцыя Recall атрымала опцыю Screenray. Яна дазваляе ў рэжыме рэальнага часу сканаваць змесціва працоўнага стала. Для гэтага карыстальнік мае націснуць клавішы Win+Shift+D, на экране з’явіцца акно Screenray. У ім адлюструецца інфармацыя аб запушчаных праграмах і кантэнце.

У гэтым акне карыстальнік можа выконваць розныя дзеянні са спасылкамі, тэкстам і малюнкамі. Напрыклад, Screenray можна выкарыстоўваць для перакладу тэксту або атрымання дадатковай інфармацыі ад АІ-памочніка Copilot пра кантэнт у праграмах або на сайтах.

Распрацоўшчыкі змянілі карыстальніцкі інтэрфейс Recall, у тым ліку абнавілі галоўную старонку, якая адкрываецца пры запуску праграмы. На ёй адлюстроўваецца некалькі апошніх здымкаў і новы тып даных — тэмы. Для свежага здымка трэба націснуць кнопку «Цяпер». Recall аналізуе здымкі і прысвойвае ім тэгі для прастаты пошуку.

Раней Microsoft абвясціла, што АІ-функцыя Recall не будзе даступная на камп’ютарах Copilot Plus PC на момант пачатку продажаў. Кампанія вырашыла паглыблена пратэсціраваць інструмент і прапрацаваць пытанні бяспекі перад укараненнем функцыі. Эксперты асцерагаюцца, што Recall стане вялікай уразлівасцю для новых прылад.