«Назвалі суму меншую на €300». Ці варта таргавацца за офер?

«Прапанаваў контрофер»

— Шукаў працу 7 месяцаў, пры гэтым працуючы на старой. У выніку атрымаў офер трохі ніжэйшы за той, што абмяркоўвалі на сумоўі.

Прапанаваў контрофер адсоткаў на 10 вышэйшы за тое, што далі, і працэнтаў на 5 вышэйшы за той, што абмяркоўвалі на пачатку. У выніку атрымаў офер з лічбамі з сумоўя. То-бок выйграў каля 5%. Паглядзім на рэйт праз год.

«Выявілася, што зп агучылі ў нета»

— Мне прапанавалі офер, пра які я першапачаткова думала, што гэта брута. У розуме адлічыла, колькі ў мяне будзе на руках. Для мяне гэта было акей, я пагадзілася. А выявілася, што агучаная сума нета. Працую ў гэтай фірме ўжо чацвёрты год (Польшча, фірма з нямецкімі каранямі).

«Сказалі, што зп і так высокая»

— У мяне былі два (такія) выпадкі. У першым наогул не хацелі дамаўляцца пра заробак. У другім кампанія спачатку хацела наняць мяне на B2B.

Я спытала пра umowu o prace. І калі паступіла прапанова, задала пытанне пра рэчы, прадугледжаныя польскім працоўным заканадаўствам, якія кампанія павінна даць.

Яны сказалі, што не, іх кампанія не дае ўсяго гэтага: «Мы далі вам дастаткова высокую зарплату. Вы павінны плаціць за ўсё гэта самі». Жарт у тым, што заробак быў зусім невысокі.

«Заробак быў вышэйшы, чым дамаўляліся»

— Пасля сумоўя ў адной кампаніі з абмеркаваннем будучай з/п неўзабаве атрымала паведамленне, што мне гатовыя ў найбліжэйшы час выслаць офер. Офер прыйшоў з пазначанай з/п на 10% вышэйшай, чым дамаўляліся. На маё здзіўленне, маўляў, як так, быў адказ: «Мы ламаем стэрэатыпы».

«Назвалі суму на €300 меншую»

— На скрынінгавым сумоўі HR агучыла адную лічбу, якая была прымальная. А калі ўжо прайшоў усе этапы, і зрабілі офер, іншая HR назвала суму на 300 еўра меншую, матывуючы, што ў іх гэта максімальны бюджэт на маю пазіцыю. Гэта была адная з прычын, чаму іх не абраў.

«Будзеце працаваць з адчуваннем, што вам недаплачваюць»

— Не лічу ганебным абмеркаваць з кампаніяй павышэнне пасля оферу.

Вам падабаецца кампанія. Але яна прапаноўвае офер па вашай просьбе, умоўна, на 10-20% ніжэйшы, чым у іншай кампаніі. Лепш шчыра сказаць, што вам хочацца зраўнаваць іх. Бо калі вы пагадзіцеся на ніжэйшы офер, то будзеце працаваць з адчуваннем, што вам недаплачваюць, і, хутчэй за ўсё, неўзабаве звольніцеся. А калі не спытаеце, то можаце пайсці не туды, куды вам хочацца.

«Нельга спыняць пошук працы адразу пасля атрымання оферу»

— Офер — гэта проста фармальнасць, якая не накладвае забавязанняў на ніводны з бакоў. Таму не варта адчуваць сябе абавязаным праз яго або адчуваць пачуццё абавязку.

Выпадкі, калі кампанія адклікае офер пасля яго выдачы, сустракаюцца часта і не заўсёды з віны кандыдата. Часам фірма можа закрыць вакансію, перадумаць або знайсці таннейшага кандыдата з аналагічнымі навыкамі. І гэта не абавязкова звязана з тым, што кандыдат запытаў больш грошай або нешта змянілася з яго боку.

Нельга спыняць пошук працы адразу пасля атрымання оферу. Пакуль кантракт не падпісаны, сітуацыя застаецца нявызначанай.

Кандыдат мае поўнае права звярнуцца да першага працадаўцы і паведаміць, што яму прапанавалі лепшыя ўмовы, прапанаваўшы перагледзець офер. Калі кампанія не гатовая павысіць умовы, сыходзіць да канкурэнтаў — абсалютна нармальна.

«Калі таргуецца джун і мідл+, то адчуванні адрозніваюцца»

— Калі ўзяць работніка ў вакууме, то так, таргавацца варта. Але ў жыцці ўсё складаней. Бо гэта залежыць ад таго, на якую пазіцыю ты сам прэтэндуеш, якія ў цябе скілы, як ты аргументуеш свой торг, рынак. Ды банальна — ці ўпэўнена ты кажаш або пішаш пра павышэнне.

Таксама, калі ты просіш умоўна на 10% больш, а табе адмаўляюць, то гэта таксама не канец. Ёсць яшчэ магчымасць дамовіцца, напрыклад, на павышэнне пасля выпрабавальнага.

Аднак калі таргуецца джун і калі гандлюецца мідл+, адчуванні, вядома, адрозніваюцца. На мой дылетанцкі погляд, у мідла больш шанцаў паспяхова дамовіцца.