«Стыў Джобс усё сапсаваў»: кафаўндар Anduril раскрытыкаваў «iPhone-логіку» сучасных тэхналогій
Палмер Лакі лічыць, што Apple зрабіла тэхналогіі занадта простымі. На ягоную думку, праз iPhone людзі больш не могуць гадамі ўдасканальваць навыкі працы з прыладамі, а вытворцы перасталі ствараць прадукты для дасведчаных карыстальнікаў.
Палмер Лакі лічыць, што Apple зрабіла тэхналогіі занадта простымі. На ягоную думку, праз iPhone людзі больш не могуць гадамі ўдасканальваць навыкі працы з прыладамі, а вытворцы перасталі ствараць прадукты для дасведчаных карыстальнікаў.
«Стыў Джобс усё сапсаваў з iPhone. Мы дасюль пакутуем ад наступстваў ягонага неверагоднага дызайну», — заявіў заснавальнік Oculus і абароннай кампаніі Anduril у інтэрв’ю біёграфу Джобса Уолтэру Айзэксану. Урыўкі з размовы апублікавала Fortune.
Паводле Лакі, раней кампутар лічыўся інструментам, які дапамагае чалавеку рабіць больш і лепш. Для засваення складаных праграм патрабаваўся час, затое дасведчаныя карыстальнікі маглі працаваць значна хутчэй навічкоў.
iPhone змяніў гэты падыход. Яго інтэрфейс настолькі просты, што разабрацца ў ім можна менш чым за хвіліну, а прыкладна за дзесяць хвілін асвоіць практычна ўсе магчымасці, лічыць прадпрымальнік. «Праблема ў тым, што цяпер усё стала iPhone. Кожны дадатак — гэта iPhone. Кожны прадукт — iPhone. Кожны VR-шлем — iPhone», — заявіў Лакі.
Ён лічыць, што вытворцы імкнуцца ствараць прылады, якімі любы чалавек зможа карыстаць без падрыхтоўкі. Але пры гэтым амаль не пакідаюць магчымасцяў для тых, хто гатовы патраціць тысячы гадзін на ўдасканаленне сваіх навыкаў.
Торвальдс назваў ШІ-выпраўленні новай нормай для Linux, але распрацоўшчыкі не вытрымліваюць: даўнейшы мэйнтэйнер сышоў праз наплыў нейрапатчаў
У якасці адваротнага прыкладу Лакі прывёў звычайную клавіятуру. Каб навучыцца хутка друкаваць, патрэбны тыдні або месяцы практыкі. Аднак у выніку чалавек атрымлівае інструмент, які дазваляе ўводзіць тэкст з велізарнай хуткасцю і дакладнасцю.
Тое ж датычыць складаных праграм і спалучэнняў клавіш, напрыклад пры працы з Excel. На думку Лакі, такія інструменты ўзнагароджваюць карыстальнікаў за патрачаны на навучанне час. «Ніхто не думае пра чалавека, які гатовы патраціць 1000, 10 000 або 50 000 гадзін, каб авалодаць сваім майстэрствам», — лічыць прадпрымальнік.
Лакі раскрытыкаваў імкненне стварыць максімальна простыя інтэрфейсы для кіравання кампутарам з дапамогай мозгу. У прыватнасці, ён засумняваўся ў тым, што магчымасці нейраінтэрфейсаў накшталт Neuralink варта зводзіць да новага спосабу націскаць кнопкі на экране.
На ягоную думку, такія тэхналогіі павінны адкрываць прынцыпова новыя магчымасці, а не папросту замяняць звыклыя спосабы кіравання. Пры гэтым Лакі прызнае, што ў яго пакуль няма гатовага рашэння. Ён расказаў, што прыдумаў некалькі ідэй інтэрфейсаў, на засваенне якіх маглі б сыходзіць годы, але не раскрыў падрабязнасцяў. «Спадзяюся, калі-небудзь мы да гэтага вернемся», — заключыў ён.
Рэлацыраваліся? Цяпер вы можаце каментаваць без верыфікацыі акаўнта.