Федэральны суд ЗША прызнаў незаконнай палітыку Дзяржаўнага дэпартамента, які з пачатку 2026 года прыпыняў выдачу імміграцыйных віз грамадзянам 75 краін. Абмежаванні распаўсюджваліся ў тым ліку на грамадзян Беларусі.
Федэральны суд ЗША прызнаў незаконнай палітыку Дзяржаўнага дэпартамента, які з пачатку 2026 года прыпыняў выдачу імміграцыйных віз грамадзянам 75 краін. Абмежаванні распаўсюджваліся ў тым ліку на грамадзян Беларусі.
Рашэнне вынесла федэральная суддзя Мангэтэна Жанет Варгас, паведамляе Reuters. Яна прыйшла да высновы, што дзяржсакратар Марка Рубіё перавысіў прадастаўленыя яму законам паўнамоцтвы. «Палітыка, якая катэгарычна забараняе выдачу імміграцыйных віз на падставе грамадзянства заяўніка, супярэчыць устаноўленай законам сістэме», — гаворыцца ў рашэнні суда.
На думку суддзі, амерыканскае імміграцыйнае заканадаўства пакідае рашэнне аб адпаведнасці канкрэтнага заяўніка патрабаванням для атрымання візы консульскім супрацоўнікам. Дзяржаўны дэпартамент не можа ўводзіць агульную забарону для грамадзян цэлых дзяржаваў без прадугледжанай законам падставы.
Прыпыненне ўвялі ў студзені 2026 года. У спіс з 75 краін увайшлі, акрамя Беларусі, Афганістан, Іран, Самалі, Бразілія, Калумбія, Уругвай, Албанія, Боснія і Герцагавіна, Расія, Пакістан, Бангладэш і шэраг дзяржаў Афрыкі, Блізкага Усходу і Карыбскага басейна.
Дзяржаўны дэпартамент тлумачыў рашэнне тым, што грамадзяне гэтых краін нібыта маюць павышаную рызыку стаць «public charge», гэта значыць у значнай ступені залежаць ад дзяржаўнай дапамогі пасля пераезду ў ЗША. Палітыку ведамства аспрэчылі праваабарончыя арганізацыі Catholic Legal Immigration Network і African Communities Together, а таксама заяўнікі на імміграцыйныя візы і грамадзяне ЗША, якія выступалі спонсарамі для сваіх сваякоў.
Пры гэтым рашэнне суда датычыць менавіта імміграцыйных віз, напрыклад, для пераезду па сямейных або працоўных прычынах. Турыстычныя ды іншыя неімміграцыйныя візы пад гэтае канкрэтнае прыпыненне не падпадалі.
Рэлацыраваліся? Цяпер вы можаце каментаваць без верыфікацыі акаўнта.