Telegram усё часцей перадае ўладам звесткі карыстальнікаў: у ЗША — тысячы, у Індыі — дзясяткі тысяч

Летась Telegram падаў уладам ЗША звесткі пра больш як 2200 карыстальнікаў. На працягу 2024 года месенджар выканаў 900 запытаў ад уладаў ЗША на даванне «IP-адраса і/або нумара тэлефона», што закранула 2253 карыстальнікаў. Гэта значнае павелічэнне ў параўнанні з першай часткай года, калі ад 1 студзеня да 30 верасня 2024 года было выканана ўсяго 14 запытаў, якія закранаюць 108 карыстальнікаў.

Кампанія таксама падала звесткі карыстальнікаў уладам іншых краін. У прыватнасці, індыйскім уладам былі перададзеныя звесткі 23 535 карыстальнікаў у 14 641 выпадку, а ўладам Вялікабрытаніі — 293 карыстальнікаў у 142 выпадках. Рэзкі рост колькасці выкананых запытаў адбыўся ў апошнім квартале 2024 года, пасля затрымання Паўла Дурава ў Францыі.

Затрыманне Дурава ў жніўні было часткова звязанае з даўняй адмовай кампаніі даваць звесткі карыстальнікаў у рамках расследавання спраў, звязаных з эксплуатацыяй дзяцей. Неўзабаве пасля арышту Дурава Telegram, відаць, змякчыў сваю палітыку ў дачыненні да апрацоўкі паведамленняў пра злоўжыванні.

Пасля затрымання Дурава, Telegram абнавіў сваю палітыку канфідэнцыйнасці, заявіўшы пра гатоўнасць даваць персанальныя даныя дзяржавам пры наяўнасці судовага прадпісання.