Tesla паказала Cybercab — робатаксі без стырна і педаляў

Робатаксі паказалі на мерапрыемстве Tesla We, Robot, якое прайшло на адной са здымачных пляцовак Warner Bros. у Каліфорніі. Для дэманстрацыі магчымасцяў электрамабіля выкарыстоўваліся дарогі не агульнага карыстання.

Cybercab мае футурыстычны дызайн, напрыклад, яго дзверы адчыняюцца ўверх. Электрамабіль пазбаўлены стырна і педаляў, таксама ў яго няма інтэрфейсу для зарадкі блока батарэй. Паводле слоў Маска, інжынеры рэалізавалі падтрымку тэхналогіі індуктыўнай зарадкі, якая дазваляе папаўняць энергію па бесправадным канале.

Стваральнікі электрамабіля сцвярджаюць, што беспілотныя аўто будуць у 10-20 разоў бяспечнейшыя за транспартныя сродкі, якія кіруюцца чалавекам. Таксама праезд у Cybercab будзе каштаваць $0,2 за мілю, тады як у гарадскіх аўтобусах праезд каштуе $1 за мілю.

Tesla плануе вывесці Cybercab на дарогі Тэхаса і Каліфорніі налета, а серыйная вытворчасць робатаксі запланаваная на 2026 год. Арыенціровачны кошт навінкі ніжэйшы за $30 тысяч. Маск не паведаміў дэталяў, дзе менавіта кампанія плануе вырабляць гэтыя аўтамабілі.