Тэхкампаніі пачалі пераглядаць падыход да выкарыстання ШІ-інструментаў супрацоўнікамі: рост выдаткаў на токены аказаўся вышэйшым за чаканы, асабліва пры працы з агентнымі сістэмамі.
Тэхкампаніі пачалі пераглядаць падыход да выкарыстання ШІ-інструментаў супрацоўнікамі: рост выдаткаў на токены аказаўся вышэйшым за чаканы, асабліва пры працы з агентнымі сістэмамі.
Праблема звязана з токенмаксінгам — імкненнем выкарыстоўваць як мага больш ШІ-токенаў у рабочых задачах. Спачатку кампаніі заахвочвалі супрацоўнікаў актыўней прымяняць ШІ, каб павысіць прадуктыўнасць. Але на практыцы гэта пачало прыводзіць да рэзкага росту выдаткаў. Асабліва дарагімі аказаліся агентныя ШІ-інструменты.
Паводле дадзеных The Verge, Microsoft пачала падштурхоўваць супрацоўнікаў да пераходу з Claude Code на ўласны Copilot CLI. Фармальная прычына — жаданне выкарыстоўваць унутраны інструмент замест старонняга, аднак крыніцы выдання сцвярджаюць, што важным фактарам стаў рост выдаткаў на Claude Code.
З падобнай праблемай сутыкнуўся Uber. Аперацыйны дырэктар кампаніі Эндру Макдональд расказаў, што ўнутры Uber стала складаней абгрунтоўваць выдаткі на ШІ. Дыскусія ўзмацнілася пасля таго, як тэхнічны дырэктар Uber Правін Непалі Нага паведаміў, што кампанія ўжо вычарпала бюджэт на Claude Code на 2026 год.
Паводле Макдональда, рост спажывання токенаў пакуль не прыводзіць да супастаўнага росту карысных функцый для карыстальнікаў. Топ-менеджар дапусціў, што каманды сапраўды пачалі выпускаць больш, аднак, паводле яго, цяжка наўпрост даказаць, што актыўнае выкарыстанне ШІ азначае, напрыклад, «на 25% больш карысных спажывецкіх функцый».
Ён таксама адзначыў, што супрацоўнікам ШІ можа здавацца бясплатным інструментам: яны проста тэстуюць розныя сцэнарыі і выкарыстоўваюць яго ў працы. Але ў канчатковым рахунку за гэта плаціць кампанія, і менавіта таму выдаткі на ШІ становяцца ўсё складаней апраўдваць.
Падобная дыскусія ідзе і ў іншых кампаніях. У Amazon некаторыя супрацоўнікі прызнаваліся, што выкарыстоўвалі ІІ нават для непатрэбных задач, каб павысіць унутраныя паказчыкі выкарыстання. Падобныя практыкі таксама звязваюць з Microsoft і Meta, дзе супрацоўнікаў актыўна стымулявалі прымяняць ШІ ў працы.
Tom’s Hardware параўноўвае сітуацыю з парадоксам Джэвонса: калі тэхналогія становіцца эфектыўнейшай і таннейшай, яе пачынаюць выкарыстоўваць настолькі часцей, што агульны расход не падае, а расце. Тое ж адбываецца з ШІ: кошт асобных токенаў зніжаецца, але іх спажыванне расце хутчэй.
Асобны прыклад — OpenClaw. Яго стваральнік Петэр Штайнбергер сцвярджаў, што ягоная каманда ў OpenAI выдаткавала больш за $1,3 мільёна на токены ўсяго за адзін месяц.
Некаторыя кампаніі ўжо пачынаюць адыходзіць ад ідэі прымушаць супрацоўнікаў выкарыстоўваць ШІ дзеля самога факту выкарыстання. Duolingo, напрыклад, адмовілася ад рашэння ўлічваць прымяненне ШІ ў ацэнцы эфектыўнасці супрацоўнікаў пасля абмеркавання ўнутры каманды.
Кіраўнік Duolingo Луіс фон Ан сказаў, што ў супрацоўнікаў узнікла адчуванне, быццам ад іх патрабуюць не выніку, а самога выкарыстання ШІ. «Здавалася, што замест адказнасці за рэальны вынік мы проста прасоўваем тое, што ў некаторых выпадках не падыходзіць», — патлумачыў ён.
Рэлацыраваліся? Цяпер вы можаце каментаваць без верыфікацыі акаўнта.