Аддзел навін 16 лістапада 2022, 13:28

У Беларусі стварылі касмічную карпарацыю

У Акадэміі навук стварылі карпарацыю «Белкосмас», паведамляе БЕЛТА.

Сярод задач карпарацыі — выпрацоўка палітыкі і стратэгіі развіцця Беларусі і Саюзнай дзяржавы ў касмічнай сферы. Плануюць праводзіць фундаментальныя даследаванні ў касмічнай сферы і распрацоўваць аэракасмічную тэхніку.

Кіраваць карпарацыяй будзе прэзідэнт НАН Уладзімір Гусакоў.

У карпарацыю ўвойдзе шэраг арганізацый-партнёраў НАН:

Аб’яднаны інстытут праблем інфарматыкі
УП «Геаінфармацыйныя сістэмы»
НПЦ шматфункцыянальных беспілотных комплексаў
кітайска-беларускае прадпрыемства «Авіяцыйныя тэхналогіі і комплексы»
«КБ Беспілотныя верталёты»

На пачатку лістапада медыя паведамлялі пра затрыманне больш як 40 супрацоўнікаў Акадэміі навук — у тым ліку працаўнікоў хімічнага і фізічнага інстытутаў. Некаторых з іх пазней адпусцілі. Прычынай затрыманняў маглі быць падпіскі на тэлеграм-чаты, прызнаныя экстрэмісцкімі беларускімі ўладамі.

У маі 2022 года быў затрыманы Павел Пятроў — інжынер факультэта радыёфізікі БДУ і адзін са стваральнікаў касмічнага спадарожніка BSU Sat-1. Яго далейшы лёс невядомы.