«У мяне не засталося нічога»: суд не дазволіў брытанцу знайсці на сметніку дыск з біткойнамі на $750 млн

Хаўэлс сцвярджае, што ў 2013 годзе яго сяброўка памылкова выкінула цвёрды дыск. У 2013 годзе біткойны на дыску каштавалі $7,5 мільёна, а на сённяшні дзень іх кошт ацэньваецца ў 598 мільёнаў фунтаў стэрлінгаў (больш за $750 мільёнаў). Паводле ацэнак Хаўэлса, налета кошт біткойнаў на дыску можа дасягнуць 1 мільярда фунтаў.

За апошнія 12 гадоў Хаўэлс неаднаразова звяртаўся ў гарадскую раду з просьбай дазволіць раскопкі, але ўлады яму адмаўлялі. Рада тлумачыла адмову тым, што выкінуты цвёрды дыск стаў уласнасцю ўладальніка звалкі, а раскопкі забароненыя правіламі аховы навакольнага асяроддзя.

На сметніку захоўваецца больш за 1,4 мільёна тон адкідаў. Хаўэлс сцвярджае, што яму ўдалося вызначыць месца знаходжання дыска ў зоне аб’ёмам 100 000 тон, але, паводле даных былога кіраўніка палігонам, дыск можа знаходзіцца ў секцыі аб’ёмам 15 000 тон, дзе адкіды былі пахаваныя ў перыяд ад жніўня да лістапада 2013 года.

Брытанец прапаноўваў у выпадку знаходжання цвёрдага дыска перадаць мясцовай радзе 10% ад сумы, выручанай ад продажу біткойнаў. Аднак пасля доўгага разбору суд заявіў пра адсутнасць «разумных падстаў» для выстаўлення пазову і «рэалістычных перспектыў» поспеху. Паводле слоў Хаўэлса, у яго адабралі «ўсё» і ён застаўся «ні з чым».