Аддзел навін 4 мая 2023, 12:25

У Google-акаўнты цяпер можна ўваходзіць без пароля

Карыстальнікі Google цяпер могуць ствараць і дапасоўваць да доступу да свайго акаўнта тэхналогію passkey (ключы шыфравання) замест звычайнага пароля або двухэтапнай аўтэнтыфікацыі. Пра гэта кампанія расказала ў блогу.

2 каментарыя

Карыстальнікі Google цяпер могуць ствараць і дапасоўваць да доступу да свайго акаўнта тэхналогію passkey (ключы шыфравання) замест звычайнага пароля або двухэтапнай аўтэнтыфікацыі. Пра гэта кампанія расказала ў блогу.

Google называе крыптаграфічныя ключы зручнейшай і бяспечнейшай альтэрнатывай паролям, паколькі надзейны пароль трэба стварыць, а затым не забыцца і бяспечна захаваць, паколькі яго могуць выкрасці зламыснікі. Ключы шыфравання вырашаюць гэтыя праблемы. Гэты спосаб цяпер працуе на ўсіх асноўных платформах і браўзерах і дазваляе ўваходзіць у сістэму і разблакоўваць камп’ютар або смартфон з дапамогай адбітка пальца, распазнавання твару або лакальнага пін-кода.

Пры выбары ключа ў якасці спосабу атрымання доступу да ўліковага запісу Google сістэма пачне запытваць яго пры ўваходзе ў рахунак або выкананні канфідэнцыйных дзеянняў. Сам ключ захоўваецца на прыладзе (камп’ютары або смартфоне), якая будзе запытваць біяметрычныя даныя або пін-код. Біяметрыя не будзе перадавацца Google або трэцім асобам і будзе выкарыстоўвацца толькі лакальна на прыладзе.

Уладальнік Google-акаўнта па-ранейшаму можа атрымліваць часовы доступ да свайго ўліковага запісу з чужой прылады. Функцыя «выкарыстоўваць пароль з іншай прылады» дазваляе выканаць аднаразовы ўваход і не пераносіць пароля на новае абсталяванне. Калі карыстальнік западозрыць, што ягоны рахунак узламаны, або страціць прыладу з ключом, то можа неадкладна адключыць гэты спосаб аўтэнтыфікацыі ў наладах уліковага запісу. Кампанія плануе вывучаць і далей укараняць ключы шыфравання — магчыма, у будучыні яны цалкам заменяць звычайныя паролі.