Алеся Чапкевич world 16 кастрычніка 2025, 17:10

У ЗША выпусцяць манету ў гонар Стыва Джобса

Манетны двор ЗША выпусціць памятную манету ў $1 з сузаснавальнікам Apple Стывам Джобсам.

На манеце будзе адлюстраваны малады Джобс, які сядзіць са скрыжаванымі нагамі на фоне каліфарнійскіх узгоркаў. Апрануты ён будзе, натуральна, у джынсы і гольф. Па краю будзе нанесены надпіс: «Зрабі штосьці цудоўнае». Менавіта так праект «Архіў Стыва Джобса» назваў кнігу з інтэрв’ю, лістамі і цытатамі прадпрымальніка.

Манета будзе каштаваць $13,25. Купіць яе можна будзе на сайце Манетнага двара ў наступным годзе.

Манету выпусцяць у рамках праекта, які быў запушчаны ў 2018 годзе і ўвекавечвае амерыканскія інавацыі. Кожны штат можа прапанаваць сваю ідэю для манеты. Вісконсін, напрыклад, вылучыў суперкампутар Cray-1 сярэдзіны 1970-х. Намінуючы Джобса, губернатар Каліфорніі Гэвін Ньюсам адзначыў, што заснавальнік Apple увасабляе той асаблівы дух інавацый, на якім трымаецца штат.