У ЗША запусцілі першы за 50 гадоў месяцовы модуль. Але адразу ўсё пайшло не так

Ракета стартавала з касмадрома базы касмічных сіл ЗША на мысе Канаверал у Фларыдзе. «Перэгрын» — апарат прыватнай кампаніі Astrobotic. Праз гадзіну палёту модуль паспяхова аддзяліўся ад ракеты і пачаў рух у бок Месяца. Аднак пазней распрацоўшчык заявіў пра «крытычную страту паліва», якая адбылася, калі спецыялісты спрабавалі вырашыць праблему з арыентацыяй модуля ў прасторы.

«На жаль, выглядае, што адмова рухальнай устаноўкі прывяла да крытычнай страты паліва. Каманда працуе над тым, каб паспрабаваць стабілізаваць страту, але, улічваючы сітуацыю, якая склалася, мы аддалі прыярытэт максімізацыі навуковых даных, якія мы можам атрымаць. У цяперашні час мы ацэньваем, якія альтэрнатыўныя профілі місіі могуць быць здзейсненыя ў дадзены момант», — гаворыцца ў паведамленні Astrobotic.

Паводле наяўных звестак, апарат не змог развярнуцца да Сонца, праз што яго акумулятары не зарадзіліся. На думку Astrobotic, верагоднай прычынай стала «анамалія рухальнай устаноўкі, якая, калі пацвердзіцца, паставіць пад пагрозу здольнасць касмічнага апарата здзейсніць мяккую пасадку на Месяцы». У выніку з дапамогай імправізаванага манеўру інжынерам удалося пераарыентаваць сонечную панэль і падзарадзіць акумулятары.

Пасадка модуля запланаваная 23 лютага ў вобласці, размешчанай на паўночна-ўсходняй частцы Акіяна Бур на бачным баку Месяца. У выпадку паспяховай пасадкі «Перэгрын» стане першым амерыканскім касмічным караблём, які дасягнуў месяцовай паверхні ад 1972 года. Таксама гэта будзе першы ў гісторыі прыватны апарат, які здзейсніць пасадку на Месяц. Аднак у сувязі са стратай паліва эксперты лічаць, што кампанія не будзе спрабаваць пасадзіць «Перэгрын».

На «Перэгрыне» знаходзяцца розныя навуковыя прыборы, у тым ліку для аналізу вады ў месяцовым грунце і вымярэння радыяцыі. Акрамя таго, модуль нясе капсулу з прахам стваральніка «Зорнага шляху» Джына Родэнберы і некалькіх акцёраў серыяла. Мемарыяльную місію арганізавала кампанія Celestis, якая запускае прах людзей у космас.