«Не» марнатраўнасці: у TikTok набірае абароты трэнд на «недаспажыванне»

Гэта дало штуршок трэнду на «underconsumption», то-бок на зніжэнне спажывання. Ён збольшага падобны да «дэінфлюенсінгу» — яшчэ аднаго трэнду, які стаў рэакцыяй на сучасную культуру анлайн-шопінгу. Дэінфлюенсеры расказваюць, якія з рэкламаваных блогерамі рэчаў не варта купляць.

Сутнасць недаспажывання ў тым, каб прасоўваць і набываць сапраўды патрэбныя тавары. Напрыклад, такія блогеры паказваюць мінімалістычную або старую вопратку са сваіх гардэробаў або касметыку, якой у іх таксама няшмат. «Выстаўляць напаказ багацце, як гэта было модна раней, цяпер лічыцца бестактоўным, безгустоўным», — кажуць дызайнеры, з якімі гэтую тэму абмяркоўваў New York Times.

Зумеры не давяраюць інфлюенсерам так, як раней. Паводле апытання даследчай фірмы Y-Pulse, 45% людзей ва ўзросце 13-22 гадоў лічаць, што ў блогераў больш няма ранейшай улады над маладымі гледачамі, а 53% палічылі б за лепшае купіць рэч, якую ім парэкамендуе звычайны чалавек. Паводле слоў спецыялістаў па інфлюенс-маркетынгу, некаторыя карыстальнікі ўпэўненыя, што блогеры падманваюць іх і толькі хочуць на іх зарабіць.

Яшчэ адная прычына, чаму моладзь імкнецца купляць менш, — банальная абмежаванасць бюджэту. Багатыя інфлюенсеры часцяком рэкламуюць далёка не самыя неабходныя тавары. Разумней і беражлівей падыходзіць да шопінгу зумераў прымушае інфляцыя, усё даражэйшыя медыцына, нерухомасць і транспарт, а таксама ўсё большыя даўгі па крэдытах. Усё гэта пагаршаецца высокай канкурэнцыяй на рынку працы і зніжэннем заробку — пакаленне Z зарабляе менш, чым міленіялы ў іх узросце дзясятак гадоў таму.