20 красавіка стала вядома, што генеральны дырэктар Apple Тым Кук пакіне пасаду з 1 верасня, прабыўшы на ёй каля 15 гадоў. З гэтай нагоды ў сваёй сацыяльнай сетцы выказаўся — у характэрнай для яго рэзкай манеры — прэзідэнт ЗША Дональд Трамп, змяшаўшы пахвалу з дзіўнымі метафарамі.
20 красавіка стала вядома, што генеральны дырэктар Apple Тым Кук пакіне пасаду з 1 верасня, прабыўшы на ёй каля 15 гадоў. З гэтай нагоды ў сваёй сацыяльнай сетцы выказаўся — у характэрнай для яго рэзкай манеры — прэзідэнт ЗША Дональд Трамп, змяшаўшы пахвалу з дзіўнымі метафарамі.
«Я заўсёды быў вялікім прыхільнікам Тыма Кука, як і Стыва Джобса, але калі б Стыва не забралі з гэтай планеты так рана, і ён працягваў бы кіраваць кампаніяй замест Тыма, кампанія б квітнела — але і блізка не так, як пры Тыме», — напісаў Трамп.
Ён адзначыў, што іх знаёмства пачалося з тэлефоннага званка кіраўніка Apple падчас ягонага першага тэрміну — маўляў, у Кука была «даволі сур’ёзная праблема», якую мог вырашыць толькі ён як прэзідэнт.
«Калі мне паступіў гэты званок, я падумаў: ваў, тэлефануе сам Тым Apple (Кук!) — нічога сабе! Я быў вельмі сабой уражаны — сам кіраўнік Apple тэлефануе, каб „пацалаваць мяне ў зад“. Ён растлумачыў сваю праблему — няпростую, трэба сказаць — я вырашыў, што ён мае рацыю, і разабраўся з гэтым хутка і эфектыўна. Так пачалася доўгая і вельмі прыемная супраца», — распавёў Трамп. Тут ён успомніў выпадак, калі блытаў прозвішча суразмоўцы. Тады ён тлумачыў, што хацеў ашчадзіць час.
Трамп дадаў, што тры ці чатыры разы значна дапамагаў Куку і казаў людзям, «што гэты хлопец — неверагодны менеджар і лідар». Але дапамагаў не заўсёды, таму што Кук «часам бывае занадта агрэсіўным у сваіх просьбах».
«Агулам, кар’ера Тыма Кука была ДЗІВОСНАЯ, амаль непараўнальная ні з чым, і ён працягне рабіць вялікія справы для Apple і чым бы яшчэ ні вырашыў заняцца. Прасцей кажучы, Тым Кук — неймаверны чалавек!!!» — напісаў Трамп.
Пра якую менавіта дапамогу ідзе гаворка, незразумела. Магчыма, Трамп меў на ўвазе, што ў першы тэрмін дапамог Apple з тарыфамі — кампанія трапіла пад гандлёвую вайну з Кітаем, і частка яе прадукцыі атрымала выключэнні. Гэта было публічна і шырока абмяркоўвалася. Астатнія кейсы, калі яны былі, верагодна, таксама пра тарыфы і рэгулятарныя пытанні, але Трамп канкрэтыкі не дае.
А Reuters толькі што выклаў вынікі рэгулярнага апытання грамадскай думкі Reuters/Ipsos — аднаго з самых аўтарытэтных у ЗША, які праводзіць разам з сацыялагічнай кампаніяй Ipsos. Рэйтынг адабрэння Трампа застыў на адзнацы 36% — гэта мінімум за ўвесь ягоны цяперашні тэрмін і ўдвая менш, чым адразу пасля інаўгурацыі ў студзені 2025 года (тады яго падтрымлівалі 47% амерыканцаў). Апытанне, у якім удзельнічала больш за 4,5 тысяч чалавек, праводзілася на фоне вайны з Іранам і публічнага канфлікту з Папам Львом.
Лічбы ў асобных тэмах яшчэ больш паказальныя. Ваенныя ўдары па Іране падтрымліваюць толькі 36% амерыканцаў, а 51% — у тым 54% беспартыйных і 85% дэмакратаў — лічаць, што за апошні год Трамп стаў цяміць горш. Ураўнаважаным яго называюць толькі 26% рэспандэнтаў; сярод рэспубліканцаў меркаванні падзяліліся амаль пароўну — 53% супраць 46%, якія яго такім не лічаць. Рэйтынг адабрэння ягоных дзеянняў у сферы кошту жыцця — 26%, столькі ж лічаць, што вайна з Іранам апраўдала выдаткі.
Релоцировались? Теперь вы можете комментировать без верификации аккаунта.