Volkswagen зрабіў офіснае крэсла з электрарухавіком і фарамі

Для перамяшчэння па офісе інжынеры абсталявалі крэсла электрычным рухавіком і педалямі. Яно здольнае развіваць хуткасць да 20 км/г і праходзіць на адной зарадцы 12 км — гэтага павінна хапіць на дзень працы.

Бяспечна выехаць з-за стала дапаможа камера задняга віду і 360-градусныя датчыкі вымярэння адлегласці. На выпадак доўгай дарогі, напрыклад, да бухгалтэрыі, у крэсле прадугледжаныя сэнсарная інфармацыйна-забаўляльная сістэма і дынамікі — можна паслухаць музыку ў дарозе. А калі ля кавамашыны раптам утварыўся «корак», прысутным можна пасігналіць — для гэтага ў крэсле ёсць клаксан.

У падлакотнікі ўбудаваныя фары і святлодыёдная RGB-падсветка, калі карыстальнік раптам вырашыць папрацаваць уначы. І ў цэлым для камфорту сядзенне ідзе з падагрэвам. Ззаду ёсць невялікі куфэрак для дакументаў або ноўтбука і нават счэпная прылада для больш сур’ёзных грузаў.

Распрацоўшчыкі кажуць, што спрабавалі прыўнесці ў крэсла як мага больш аўтамабільных функцый і прыдумаць дызайн, які быў бы блізкі па духу аўтамабілям нямецкага канцэрна. Серабрысты лагатып Volkswagen нанесены на падгалоўнік і дыскі колцаў крэсла.

Выпускаць крэсла на рынак Volkswagen не плануе. Насамрэч, усё гэта — частка рэкламы мінівэнаў кампаніі.