Супрацоўнікі Nvidia патрабуюць вярнуць Джэнсэна Хўанга пасля скандальнай адстаўкі. Ва ўнутраным абмеркаванні назбіралася больш за 1600 каментарыяў, большасць — у падтрымку былога кіраўніка кампаніі.
Супрацоўнікі Nvidia патрабуюць вярнуць Джэнсэна Хўанга пасля скандальнай адстаўкі. Ва ўнутраным абмеркаванні назбіралася больш за 1600 каментарыяў, большасць — у падтрымку былога кіраўніка кампаніі.
Як піша Wired, абмеркаванне пачалося яшчэ да адстаўкі Хўанга. Адзін з вопытных інжынераў прапанаваў радзе дырэктараў улічваць меркаванне супрацоўнікаў, перш чым прымаць рашэнне пра будучыню кіраўніка. Пасля сыходу Хўанга 12 лістапада публікацыя ператварылася ў пляцоўку для заклікаў вярнуць яго.
«Калі вы верыце ў нашу місію, вярніце САПРАЎДНАГА боса», — напісаў адзін з супрацоўнікаў ананімна. «Мы ўсе людзі і можам памыляцца. Джэнсэн зрабіў столькі добрага і заслугоўвае другога шанцу», — дадаў іншы.
Адзін з працаўнікоў нават разаслаў ліст усёй кампаніі з патрабаваннем растлумачыць прычыны адстаўкі. Ён падкрэсліў, што падтрымлівае Хўанга не таму, што лічыць яго бездакорным, а з павагі да ягонага ўкладу ў развіццё Nvidia.
Паводле дадзеных выдання, пасля адстаўкі каля двух дзясяткаў супрацоўнікаў публічна падтрымалі Хўанга ў LinkedIn. Журналісты не выявілі публікацый працаўнікоў Nvidia, якія прывітавалі б ягоны сыход.
Многія супрацоўнікі разлічвалі, што рада дырэктараў спачатку завершыць расследаванне акалічнасцяў меркаванага рамана Хўанга з жанчынай, якую амерыканскія спецслужбы падазраюць у сувязях з кітайскай выведкай. Аднак кіраўнік пакінуў кампанію неўзабаве пасля пачатку правярання.
Тым часам з’явіліся новыя падрабязнасці ягонага асабістага жыцця. Як паведамляе Reuters са спасылкай на дзве крыніцы, Хўанг меркавана знаходзіўся ў адносінах яшчэ з адной супрацоўніцай Nvidia. Ейнае імя агенцтва не раскрывае.
Раней СМІ расказалі пра меркаваныя раманы Хўанга з прадпрымальніцай Алісай Хўанг і віцэ-прэзідэнтам Nvidia у ахове здароўя Кімбэрлі Паўэл. Такім чынам, гаворка ідзе ўжо пра тры меркаваныя пазашлюбныя сувязі, дзве з якіх — з супрацоўніцамі кампаніі.
Сам Хўанг 8 лістапада прызнаўся ў здрадзе жонцы, але не ўдакладніў, з кім менавіта знаходзіўся ў адносінах. Новыя паведамленні ён не каментаваў. Пасля ягонай адстаўкі часовым генеральным дырэктарам стала фінансавы дырэктар Калет Крэс, а раду дырэктараў узначаліў Гарві Джонс.
За час скандалу кампанія страціла каля $1 трыльёна рынкавага кошту, падлічыла выданне. Пры гэтым публічных прыкметаў таго, што рада дырэктараў разглядае вяртанне Хуанга, пакуль няма.
Релоцировались? Теперь вы можете комментировать без верификации аккаунта.