Выкіды парніковых газаў у Google выраслі на палову за 5 гадоў

Паводле справаздачы, выкіды парніковых газаў у 2023 годзе дасягнулі 14,3 мільёна тон вугляроднага эквіваленту. Гэта на 48% больш, чым у 2019 годзе, і на 13% больш у параўнанні з 2022 годам. У ланцужку паставак рост выкідаў склаў 8%, гэта 75% ад агульнага аб’ёму выкідаў кампаніі.

Асноўнай прычынай росту выкідаў стала павелічэнне спажывання электраэнергіі цэнтрамі апрацоўкі даных, неабходнымі для працы АІ-сістэм. У 2023 годзе выкіды, звязаныя з энергетыкай, склалі чвэрць ад агульнага аб’ёму выкідаў парніковых газаў кампаніі. Паводле ацэнак Google, на яе цэнтры апрацоўкі даных прыпадае да 10% сусветнага спажывання электраэнергіі ЦАД у 2023 годзе.

«Па меры далейшага ўкаранення штучнага інтэлекту ў нашыя прадукты скарачэнне выкідаў можа стаць складанай задачай праз усё большыя патрэбы ў энергіі, звязаныя з інтэнсіўнейшымі вылічэннямі з выкарыстаннем штучнага інтэлекту, і выкідаў, звязаных з чаканым павелічэннем інвестыцый у нашую тэхнічную інфраструктуру», — гаворыцца ў справаздачы.

Эксперты чакаюць, што негатыўная тэндэнцыя захаваецца ў найбліжэйшыя гады праз пашырэнне інфраструктуры, неабходнай для АІ. У кампаніі прызналі, што ўздзеянне АІ на навакольнае асяроддзе ў будучыні «складана і цяжка прадказаць». Тым не менш Google працягвае працаваць над скарачэннем выкідаў.

Дырэктар па ўстойлівым развіцці Google Кейт Брант прызнаў, што заяўленыя мэты дасягнення нулявога балансу — занадта амбіцыйныя. «Мы па-ранейшаму чакаем, што нашыя выкіды працягнуць расці, але да пэўнага моманту», — растлумачыў ён.

Паводле даных Міжнароднага энергетычнага агенцтва (International Energy Agency), сёння цэнтры апрацоўкі даных у свеце спажываюць каля 1 адсотка электраэнергіі. Але ў сувязі з бурным развіццём індустрыі штучнага інтэлекту IEA мяркуе, што ў 2026 годзе галіна АІ можа спажываць у 10 разоў больш электраэнергіі, чым летась.

Пра гэта ж кажуць даныя аналітычнай кампаніі Bernstein: АІ можа падвоіць тэмпы росту спажывання электраэнергіі ў ЗША ў найбліжэйшыя гады, на што паказваюць буйныя інвестыцыі ў галіну такіх тэхнагігантаў, як Google, Amazon і Microsoft. Апошняя прызнала, што яе выкіды выраслі амаль на траціну ад 2020 года ў тым ліку праз будаўніцтва цэнтраў апрацоўкі даных.