Wargaming перадаў медыкам ва Украіне 13 рэанімабіляў. На машыны сабралі больш за $1 млн

Рэанімабілі былі пастаўленыя медыкам у дзесяці рэгіёнах Украіны. 

У кастрычніку мінулага года Wargaming запусціў дабрачынны праект #WargamingUnited у падтрымку Украіны.

Да ініцыятывы далучыліся геймеры са 115 краін свету. Большасць — з Германіі, ЗША, Польшчы, Чэхіі і Вялікабрытаніі. Гульцы набылі 90 тысяч дабрачынных набораў. Усе сродкі былі пераведзеныя фонду United24, створанаму з ініцыятывы ўкраінскага прэзідэнта Уладзіміра Зяленскага.

Lesta Games, якая развівае праект «Свет танкаў», тады ж паспяшалася нагадаць пра недатычнасць да кампаніі Wargaming.

«Мы не маем дачынення да іншых гульняў і праектаў падобнай тэматыкі. Можам запэўніць нашых гульцоў, што плацяжы ў „Свет танкаў“, „Свет караблёў“ і Tanks Blitz абсалютна бяспечныя і не парушаюць заканадаўства РФ і Беларусіі [sic]. А ўсе грошы і рэсурсы мы выкарыстоўваем толькі для распрацоўкі і аперавання бягучымі і новымі прадуктамі і захавання і развіцця айчыннай гульнявой галіны».