Wildberries плануе запусціць у Беларусі таксі-сэрвіс

Паводле слоў адной з крыніц, інтэрфейс праграмы ўжо гатовы. Але тэрміны запуску пакуль невядомыя. «Пілотны праект можа запусціцца ў Мінску толькі пасля завяршэння ўсіх неабходных для яго старту працэсаў», — адзначыў прадстаўнік кампаніі.

Паводле яго слоў, за 20 гадоў працы ў сферы электроннай камерцыі Wildberries назбірала значны вопыт у арганізацыі транспартных і лагістычных працэсаў.

Кампанія развівае ўласны аўтапарк, супрацоўнічае з партнёрамі і прыцягвае прыватных перавозчыкаў, удакладніў ён. Маштаб лагістычных задач у перыметры платформеннага бізнэсу дазваляе Wildberries эфектыўна нарошчваць экспертызу ў новых лагістычных прадуктах, сказаў прадстаўнік маркетплэйса.

Але пытанне пра запуск гэтага віду бізнэсу ў Беларусі і маштабаванне праекта будзе вырашацца толькі пасля ацэнкі перспектыў гэтага напрамку і па выніках пілота, адзначыў ён.

На мінулым тыдні заснавальніца Wildberries Таццяна Кім пабывала на сустрэчы прадстаўнікоў бізнэсу з Аляксандрам Лукашэнкам. 

Кім расказала, што Wildberries інвесціруе ў будаўніцтва лагістычнага комплексу пад Мінскам на суму каля 11 млрд расійскіх рублёў (больш за $120 млн па бягучым курсе).

 — У нас 140 тыс. кв. метраў. Калі мы аперуем расійскімі грашыма, то ў нас на кожныя 100 тысяч квадратаў каля 8 млрд расійскіх рублёў.

Wildberries купіў у беларуска-кітайскім індустрыяльным парку «Вялікі камень» 27 га зямлі. Летась на гэтай тэрыторыі пачалося будаўніцтва лагістычнага комплексу. Чакаецца, што тут будзе створана каля 5-6 тыс. працоўных месцаў.